ترجمان پاک فوج لیفٹیننٹ جنرل احمد شریف چودھری نے برطانوی نشریاتی ادارے سکائی نیوز سے بات کرتے ہوئے کہا کہ جو بھی ہماری سرزمین، سالمیت اور خودمختاری کی خلاف ورزی کرنے کی کوشش کرے گا، ہمارا جواب بے رحمانہ ہو گا۔
ڈی جی آئی ایس پی آر نے متنبہ کیا کہ پاکستان اور بھارت دونوں ایٹمی طاقت ہیں ،سنگین کشیدگی تباہی کا باعث ہو گی، اگر بھارت سمجھتا ہے کہ وہ پاکستان کے خلاف جنگ کا محاذ کھڑا کر سکتا ہے تو یہ خطے میں تباہی کا باعث ہوگا۔
لیفٹیننٹ جنرل احمد شریف چودھری کا کہنا تھا کہ امریکا جیسے ممالک جوہری خطرات کے پیش نظر بھارت کے عزائم کو بخوبی جان چکے ہیں، بھارت کشمیر کے مسئلے کو "اندرونی" معاملہ قرار دے کر بھاری فوج کی موجودگی کے ساتھ کشمیریوں کو "ہراساں" کر رہا ہے۔
ترجمان پاک فوج نے مزید کہا کہ مسئلہ کشمیر کو اقوام متحدہ کی سلامتی کونسل کی قراردادوں کے مطابق کشمیری عوام کو حل کرنا ہوگا۔
سکائی نیوز نے ڈی جی آئی ایس پی آر لیفٹیننٹ جنرل احمد شریف چودھری کے بیان پر تبصرہ کرتے ہوئے کہا کہ پاکستانی مؤقف کے مطابق اس نے بھارت کی بہت بڑی مسلح افواج کے باوجود ایک بہت بڑی فوجی فتح حاصل کی ہے۔
سکائی نیوز کا مزید کہنا تھا کہ بھارت اس بات پر ناراض ہے امریکا اس بحران کے دوران مسئلہ کشمیر کو اجاگر کر رہا ہے ، اب امریکا کیلئے اصل امتحان یہ ہے کہ وہ بھارت پر کتنا دباؤ ڈال سکتا ہے؟
