وزیراعلیٰ پنجاب مریم نواز نے جی سی یونیورسٹی فیصل آباد میں تقریب میں بطور مہمان خصوصی شرکت کی ، مریم نواز کی آمد پر فیصل آباد کے طلبہ کا جوش و خروش دیدنی تھا، طلبہ نے نعروں اور تالیوں سے وزیراعلیٰ کا استقبال کیا، مریم نواز نے تقریب میں آمد پر ہاتھ ہلا کر طلبہ کے خیرمقدمی نعروں کا جواب دیا۔

دوران تقریب طالبات نے وزیراعلیٰ مریم نواز کو پورٹریٹ اور پنسل سکیچ پیش کیے،جی سی یونیورسٹی کی طالبات نے وزیراعلیٰ کو خوبصورت شال کے تحائف بھی پیش کیے، اس موقع پر وزیراعلیٰ مریم نواز نے طلبہ کو لیپ ٹاپ اور ہونہار سکالر شپ کے چیکس دیے ۔

مریم نواز نے تقریب میں موجود فیصل آباد ڈویژن کے ارکان اسمبلی اور ٹکٹ ہولڈر سے ان کی نشستوں پر جاکر ملاقات کی،وزیراعلیٰ اپنی نشست چھوڑ کر طلبہ کے درمیان بیٹھ گئیں، مریم نواز کی ہدایت پر طلبہ کو لیڈیز پولیس کے چاق وچوبند دستے نے گارڈ آف آنر بھی پیش کیا۔

وزیراعلیٰ مریم نواز نے طالبعلم محمد عبداللہ رضا کو پر تاثیر تلاوتِ قرآن مجید اور طالبہ کو ہدیہ نعت پیش کرنے پر مبارکباد دی اور "میری سرحد پہ پہرا ہے ایمان کا" نغمہ پیش کرنے پر طلبہ کو انعام دیا، طلبہ کی درخواست پر وزیراعلی مریم نواز خود بھی ترانے میں شامل ہوگئیں۔

تقریب میں ہائر ایجوکیشن کمیشن کی طرف سےلیپ ٹاپ اور ہونہار سکالر شپ پرخصوصی ڈاکو مینٹری پیش کی گئی، ہونہار سکالر شپ فیز ٹو کے تحت دو سے پانچ سال اور تیسرے سے آٹھویں سمیسٹر کے 4075طلبہ کو سکالر شپس ملیں گے۔

فیصل آباد ڈویژن کے سرکاری کالجز، میڈیکل کالجزاور یونیورسٹیوں کےطلبہ کے لئے 10کروڑ روپے سے زائد کے سکالر شپ رکھے گئے ہیں، فیصل آباد ڈویژن میں کالجز کے1531طلبہ کو 29 لاکھ ،میڈیکل کالجز کے 82 طلبہ کو 4 لاکھ اور یونیورسٹیز کے 2462 طلبہ کو 67 لاکھ کے سکالر شپ دیے جائیں گے۔

اسی طرح فیصل آباد ڈویژن کے طلبہ کو 5928 لیپ ٹاپ دئیے گئے،سرکاری یونیورسٹیوں کے طلبہ کو 4224 ، میڈیکل کالجز کے 319 طلبہ اور کالجز کے 1385 طلبہ کو لیپ ٹاپ دیئے گئے۔

وزیر اعلی مریم نواز طلبہ میں گھل مل گئیں، طالبات سے ہاتھ ملائے اورسلیفیاں بنوا ئیں، وزیراعلیٰ مریم نواز نے طلبہ سے ملکر" پاکستان زندہ باد "کا فلک شگاف نعرہ لگایا۔