وفاقی وزیر دفاع خواجہ آصف نے عرب ٹی وی الجزیرہ کو انٹرویو دیتے ہوئے کہا کہ ہم امن چاہتے ہیں، مگر بھارت کی مسلسل جارحیت نے خطے کو تصادم کے دہانے پر لا کھڑا کیا ہے، ہمارا صبر جواب دے چکا، تین روز سے بھارتی کارروائیاں دیکھ رہے ہیں۔

خواجہ آصف کا کہنا تھا کہ پاکستان ہمیشہ ذمہ دار ریاست کے طور پر ایکٹ کرتا ہے، بھارت کے 78 طیارو ں نے پاکستانی حدود کی خلاف ورزی کی، ہم نے پانچ بھارتی طیارے مار گرائے، بھارت کشیدگی میں کمی کی بجائے  صورتحال مزید کشیدہ کر رہا ہے، صورتحال بگڑنے کی صورت میں کشیدگی بین الاقوامی سرحدوں تک پھیل سکتی ہے۔

 انہوں نے کہا کہ نریندر مودی سیاسی ناکامیوں سے توجہ ہٹانے کے لیے جنگی ماحول پیدا کر رہے ہیں، بھارت پاکستان پر دہشت گردی کے جھوٹے الزامات لگا رہا ہے، پاکستان نے آزادانہ تحقیقات کی پیشکش کی، تو بھارت نے اسے مسترد کر دیا، اپنے دفاع کا حق رکھتا ہے، اگر بھارت نے حملے جاری رکھے تو پاکستان جواب دینے میں تاخیر نہیں کرے گا۔