قومی اسمبلی میں اپنے پالیسی بیان کے دوران وزیر اطلاعات عطا تارڑ کا کہنا تھا کہ قوم کو یقین دلاتا ہوں ملکی سلامتی مضبوط اور قابل اعتماد ہاتھوں میں ہے، بھارت کو ضرور جواب دیا جائے گا اور وہ فیصلہ کن ہوگا، اس کی ٹائمنگ کا فیصلہ پاک فوج کرے گی۔

انہوں نے کہا کہ وہ اپوزیشن کا بھی شکریہ ادا کرتے ہیں کہ موجودہ صورتحال میں پوری قوم یکجہتی کا مظاہرہ کر رہی ہے، دشمن نے رات کی تاریکی میں حملہ کیا اور رافیل جیسے جدید طیاروں کا استعمال کیا لیکن پاک فوج نے جرات مندی سے ان کا مقابلہ کیا۔

ان کا کہنا تھا کہ بھارت کو اپنی ٹیکنالوجی پر غرور تھا، لیکن اسے منہ کی کھانی پڑی جس کے بعد اس نے اپنی حکمت عملی تبدیل کی، دشمن نے بزدلی سے حملہ کیا، مگر ہماری افواج نے بھرپور جواب دے کر ثابت کیا کہ پاکستان دفاعی صلاحیتوں میں کسی سے پیچھے نہیں۔

عطااللہ تارڑ نے کہا کہ بھارت صرف طیارے نہیں بلکہ اپنی انا بھی گرا بیٹھا ہے، وہ رافیل کا ملبہ چھپانا چاہتا تھا لیکن اب پوری دنیا اس کا مشاہدہ کر رہی ہے، ہم اپنے جانبازوں کو سلام پیش کرتے ہیں جنہوں نے ایک بار پھر دشمن کو پسپا ہونے پر مجبور کر دیا۔

وزیراطلاعات کا کہنا تھا کہ دشمن اب ڈرونز کے ذریعے حملے کی کوشش کر رہا ہے لیکن ہماری ایئر ڈیفنس نے 25 میں سے کئی ڈرونز کو کامیابی سے نشانہ بنایا اور کئی کو جام کر کے گرایا، اصل طاقت جہاز میں نہیں، پائلٹ میں ہوتی ہے۔

وفاقی وزیر نے کہا کہ لائن آف کنٹرول پر بھارت کی پسپائی پاکستان کی فتح کی علامت ہے، بھارتی بریگیڈ ہیڈکوارٹرز کو نشانہ بنایا گیا اور 40 سے 50 فوجی ہلاک ہوئے، جو پاکستان کی دفاعی برتری کا ثبوت ہے۔

آخر میں انہوں نے کہا کہ ردعمل ناگزیر ہے لیکن یہ جلد بازی میں نہیں ہوگا، پاک فوج صورتحال کا بغور جائزہ لے کر وقت اور طریقہ کار خود طے کرے گی اور دشمن کو ایسا جواب دیا جائے گا جو وہ کبھی بھلا نہ سکے۔