وفاقی تحقیقاتی ادارہ (ایف آئی اے) کے سائبر کرائم ونگ نے پی ٹی آئی کے پانچ رہنماؤں کو سوشل میڈیا پر متنازع اور ہتک آمیز مہم چلانے کے معاملہ کی تحقیقات کیلئے جے آئی ٹی کے سامنے پیش ہونے کی ہدایت کی ہے۔

تحریک انصاف کے رہنماؤں کی طلبی کے حوالے سے ایف آئی اے نے نوٹس بھی جاری کردیا، نوٹس سیکشن 160 سی آر پی سی کے تحت جاری کیا گیا ہے۔

جے آئی ٹی کی جانب سے پی ٹی آئی کے پانچ رہنماؤں کو 14 اپریل(پیر) کو صبح 11 بجے سائبر کرائم ونگ ہیڈکواٹرز طلب کیا گیا ہے، پی ٹی آئی رہنماؤں میں حماد اظہر ، عالیہ حمزہ، وقاص اکرم، محمد کامران اور فرخ حبیب شامل ہیں۔

پی ٹی آئی رہنماؤں کو جاری نوٹس میں کہا گیا ہے کہ جے آئی ٹی کے پاس آپ سے متعلق کافی حد تک مواد موجود ہے جس سے ظاہر ہوتا ہے کہ آپ یا تو معاملے میں ملوث رہے ہیں یا حقائق کو جان بوجھ کر چھپا رہے ہیں، لہٰذا جے آئی ٹی کے روبرو پیش ہوں اور اپنی پوزیشن واضح کریں۔

نوٹس میں یہ بھی واضح کیا گیا ہے کہ اگر پیش نہ ہوئے تو یہ سمجھا جائے گا کہ آپ کے پاس اپنی صفائی میں کہنے کے لیے کچھ نہیں ہے۔

ایف آئی اے کی جانب سے پی ٹی آئی کے پانچوں رہنماؤں کو اصل شناختی کارڈ اور شواہد کے ساتھ ساتھ اپنی صفائی پیش کرنے کے لیے متعلقہ دستاویزات بھی ساتھ لانے کی ہدایات کی گئی ہیں۔