ایوی ایشن ذرائع کے مطابق لاہور ائیرپورٹ سے ٹیک آف کرتے ہی نجی ایئرلائن کے طیارے کے انجن میں خرابی پیدا ہو گئی،8گھنٹے تاخیر سے لاہور سے جدہ روانہ ہونے والی پرواز کی اڑان بڑھتے ہی ہنگامی لینڈنگ کرنا پڑی۔

ایئرپورٹ ذرائع کا بتانا ہے کہ کاکپٹ کریو کی جانب سے انجن میں شدید وائبریشن کی نشاندہی کی گئی جس پر پائلٹ کی جانب سے ایئر ٹریفک کنٹرول (اے ٹی سی )حکام سے لینڈنگ کی اجازت طلب کی گئی۔

ذرائع کے مطابق اے ٹی سی حکام نے طیارے کو فوری لینڈنگ کی ہدایات دیں جس پر پائلٹ نے طیارے کو بحفاظت لاہور ایئرپورٹ پر لینڈ کروایا جبکہ طیارے میں سوار 200سے زائد مسافروں کو ویٹنگ ایریا میں بجھوا دیا گیا۔

ایئرپورٹ ذرائع نے بتایا ہے کہ رن وے پر طیارے کی ابتدائی انسپیکشن میں انجن میں خرابی سامنے آئی ہے، ائیرلائن انجینئرز کی جانب سے طیارے میں خرابی کی وجوہات بارے تفصیلی معائنہ کیا جارہا ہے۔

دوسری جانب نجی ایئرلائن انتظامیہ نے متبادل پرواز کے ذریعے مسافروں کو ایڈجسٹ کرکے جدہ روانہ کرنے کا فیصلہ کیا ہے۔