وزیر اعلیٰ مریم نواز کی زیر نگرانی ٹرانسپورٹ کرایوں میں اوور چارجنگ کے خلاف گرینڈ آپریشن جاری ہے، لاہور سمیت تمام اضلاع میں محکمہ ٹرانسپورٹ نے اوورچارجنگ کیخلاف گرینڈ آپریشن کے دوران مسافروں کو 11لاکھ روپے واپس دلا دیئے ۔

محکمہ ٹرانسپورٹ کی جانب سے اوورچارجنگ کرنے والے ٹرانسپورٹرز کو 23لاکھ سے زائد جرمانے عائد کیے گئے جبکہ ایک ہزار 313 سے زائد گاڑیوں کے چالان اورکرایوں میں اوورچارجنگ کرنے پر 264گاڑیاں بند کر دی گئیں۔

کرایوں میں اوورچارجنگ کی مد میں ناجائز طور پر وصول کردہ رقم واپس ملنے پر مسافروں نے حیرانی کا اظہار کرتے ہوئے کہا کہ شکریہ وزیراعلیٰ مریم نواز،پہلی دفعہ عید پر گھر جانے والے پردیسیوں کا کسی کو خیال آیا ، اوورچارجنگ کی رقم واپس ملنے پر بزرگ خواتین مسافروں نے وزیر اعلیٰ مریم نواز کو دعائیں دیں۔

وزیراعلیٰ پنجاب کی ہدایت پر مسافروں کے لئے خصوصی ہیلپ لائن 99030222 042 بھی قائم کردی گئی جبکہ محکمہ ٹرانسپورٹ کے ملازمین او رافسران کی عید کی چھٹیاں منسوخ کر کے انہیں فیلڈ میں ڈیوٹی دینے کی ہدایت کی گئی ہے،عید کے ایام میں محکمہ ٹرانسپورٹ کا سپیشل سکواڈ بڑے بس سٹینڈز پر موجود رہے گا۔

مریم نواز نے کہا کہ شہری صرف مقررہ کرایہ ہی ادا کریں، کرائے نامے گاڑیوں اور ٹرانسپورٹ اڈوں پر نمایاں آویزاں کئے جائیں۔