لاہور ہائیکورٹ میں پاکستان تحریک انصاف کے رہنما اکمل خان باری نے درخواست دائر کی جس میں ڈپٹی کمشنر لاہور سمیت دیگر کو فریق بنایا گیا ہے۔

درخواست گزار کی جانب سے مؤقف اپنایا گیا ہے کہ 22 مارچ 2025 کو مینار پاکستان گراؤنڈ میں جلسے کی اجازت کیلئے ڈپٹی کمشنر لاہور کو درخواست دی، ہماری درخواست پر متعلقہ کمیٹی نے بلوا کر مؤقف سنے بغیر فیصلہ کیا۔

لاہور ہائیکورٹ میں دائر درخواست میں کہا گیا ہے کہ کمیٹی کے فیصلے سے متعلق درخواست گزار کو علم نہیں تھا، ڈپٹی کمشنر لاہور کی جانب سے سست روی کے باعث 22 مارچ کو جلسہ نہیں کرسکے۔

درخواست گزار کی جانب سے استدعا کی گئی کہ لاہور ہائیکورٹ 22 اپریل کو ضلعی انتظامیہ جلسے کی اجازت دینے کا حکم دے، عدالت عالیہ22 اپریل کو جلسے کی اجازت کی درخواست منظور کرے۔

یاد رہے کہ اس سے قبل بھی تحریک انصاف کی جانب سے 22 مارچ کو مینار پاکستان پر جلسے کی اجازت کی درخواست دی گئی تھی جو عدالت عالیہ نے ضلعی انتظامیہ کی رپورٹ کی روشنی میں مسترد کردی تھی۔