وزیراعلیٰ مریم نواز کی زیر صدارت پنجاب سکلز ڈویلپمنٹ اینڈ انٹر ٹرینیور شپ ڈیپارٹمنٹ کا پہلا اجلاس ہوا جس میں سیکرٹری پنجاب سکلز ڈویلپمنٹ اینڈ انٹر پرینیورشپ ڈیپارٹمنٹ نادر چٹھہ نے تفصیلی بریفنگ دی۔
بریفنگ میں بتایا گیا کہ سکلز ڈویلپمنٹ کے تمام اداروں کو ایک ہی ڈیپارٹمنٹ کے ماتحت کر دیا گیا ہے، ٹیوٹا ، پی ایس ڈی ایف اور پی وی ٹی سی سکلز ڈویلپمنٹ اینڈ انٹر پرینیورشپ ڈیپارٹمنٹ کے تحت کام کریں گے جبکہ سی ایم سکلڈ پنجاب اینیشیٹو کے تحت 4 ہزار نوجوانوں کی انٹرنیشنل آئی ٹی سرٹیفکیشن مکمل ہو چکی ہے۔
بریفنگ میں مزید بتایا گیا کہ ٹرانس جینڈر کے لئے سکل ڈویلپمنٹ کا پروگرام"پہچان" جاری ہے جس کے تحت 1600 ٹرانس جینڈر زکی ٹریننگ مکمل ہو چکی ہے،ٹیکسٹائل، میک اپ اور بیک سٹیج پروڈکشن ٹریننگ حاصل کرنے والے ٹرانس جینڈر کو 8ہزار روپے ماہانہ دیا جارہا ہے۔
وزیراعلیٰ مریم نواز نے ایک لاکھ ہنر مند نوجوانوں کی ٹریننگ اور جاب پلیس منٹ کا ٹارگٹ دے دیا اور ہنر مند افرادی قوت کو بیرون ملک بھیجنے کے لئے جامع پلان طلب کر لیا،وزیراعلیٰ نے ہنر مند نوجوانوں کو ترجیحی بنیادوں پر کاروبار کارڈ اور کاروبارفنانس لون دینے کی بھی ہدایت کی۔
دوران اجلاس نجی اشتراک سے دوردراز علاقوں کے نوجوانوں کے لئے سکلز آن ویل پراجیکٹ متعارف کرانے کا فیصلہ کیا گیا جبکہ پنجاب میں پلگ اینڈ پلے کال سنٹرز کے قیام کی بھی منظوری دی گئی، آئی بی ای ایکس کے اشتراک سے پہلے فیز میں 5 ہزار نوجوانوں کو کال سنٹر ٹریننگ دی جائے گی،6 ہفتے کی کال سنٹر ٹریننگ کے بعد نوجوان کم از کم ایک لاکھ روپے ماہانہ کی جاب حاصل کر سکیں گے۔
اجلاس کے دوران ہنر مند کارڈ کے اجراء کی تجویز کا بھی جائزہ لیا گیا، وزیراعلیٰ کو بتایا گیا کہ گارمنٹس ٹریننگ انسٹی ٹیوٹ قائد اعظم بزنس پارک میں 480خواتین کی ٹریننگ کرائی جائے گی،گارمنٹس ٹریننگ حاصل کرنے والی خواتین کو پک اینڈ ڈراپ اور ماہانہ 20ہزار روپے ملیں گے،بڑے ٹیکسٹائل گروپس میں ٹریننگ حاصل کرنے والی طالبات کی جاب پلیس منٹ کی جائے گی۔
وزیراعلیٰ مریم نواز نے انٹرنیشنل سرٹیفکیشن کورس کی تعداد 10ہزار کرنے کی ہدایت کی جبکہ ہاسپٹلٹی سیکٹر ٹریننگ کے لئے"مراکی" پراجیکٹ متعارف کرانے کا فیصلہ کیا گیا ، برطانوی ادارے سی ٹی ایچ کے اشتراک سے چھ ماہ کی فری ہاسپٹلٹی ٹریننگ کرائی جائے گی، بڑے ہوٹلز میں ہاسپٹلٹی ٹریننگ حاصل کرنے والے نوجوانوں کی جاب پلیس منٹ کا اہتمام بھی کیا جائے گا۔
وزیراعلیٰ پنجاب مریم نواز نے اجلاس کے دوران گفتگو کرتے ہوئے کہا کہ نوجوانوں کو ترقی کے سفر میں شامل کرنے کے لئے ٹریننگ اور جاب مارکیٹ مہیا کریں گے،ہنر مند نوجوانوں کا ہاتھ تھام کر ہی خوشحالی کے راستے پر چلنا ممکن ہوگا،ہنر مند نوجوان پاکستان کا آج اور کل ہیں،حکومت پنجاب نوجوانوں کی ٹریننگ اور جاب پلیس منٹ کے لئے اینڈ ٹو اینڈسپورٹ کرے گی۔
