سیکیورٹی ذرائع کے مطابق سیکیورٹی فورسز کا دہشت گردوں کے خلاف آپریشن جاری ہے۔ خود کش بمباروں نے عورتوں اور بچوں کو ڈھال بنایا ہوا ہے، خود کش بمباروں نے تین مختلف جگہوں پر عورتوں اور بچوں کو یرغمال بنا رکھا ہے، عورتوں اور بچوں کی خود کُش بمباروں کے ساتھ موجودگی کی وجہ سے آپریشن میں انتہائی اختیاط برتی جا رہی ہے۔

سیکیورٹی ذرائع کا کہنا ہے کہ 37 زخمیوں کو طبی امداد کے لئے روانہ کر دیا گیا ہے، اب تک 155 مسافروں کو دہشت گردوں سے بازیاب کروا لیا گیا ہے، اب تک 27 دہشت گردوں کو جہنم واصل کیا جا چکا ہے، باقی ماندا دہشت گردوں کے خاتمے کے لئے سیکیورٹی فورسز کا آپریشن جاری ہے۔

دہشت گردوں سے رہائی پانے والے ایک مسافر نے اظہار تشکُّر کرتے ہوئے کہا کہ فائرنگ ہوئی، اللّٰہ کا شکر ہے کہ فوجیوں اور ایف سی نے ہمت کی اور ہمیں با حفاظت یہاں لے آئے، یرغمالی کے مطابق یہ فوجیوں اور ایف سی والوں کی ہی ہمت تھی کہ ہمیں بازیاب کرا کر یہاں تک باحفاظت پہنچا دیا۔