وزیرا عظم آفس کی جانب سے جاری ایک بیان میں بتایا گیا ہے کہ وزیر اعظم شہباز شریف کی زیر صدارت رمضان المبارک کے دوران اشیائے خور ونوش کی ارزاں نرخوں پر فراہمی کرنے کیلئے قائم کردہ کمیٹی کی کارکردگی کے حوالے سے جائزہ اجلاس ہوا۔

اجلاس میں وفاقی وزرا ء احد خان چیمہ ، عطا اللہ تارڑ ، احسن اقبال، ڈاکٹر طارق فضل چودھری، حنیف عباسی، وزیر مملکت طلال چودھری اور متعلقہ اداروں کے اعلیٰ افسران نے شرکت کی،وزیراعظم نے رمضان المبارک میں اشیائے خورونوش کی قیمتیں کنٹرول کرنے اور عوام کو اشیائے ضروریہ ارزاں نرخوں پر فراہمی پر کمیٹی اور اسلام آباد انتظامیہ کی کاکردگی کی تعریف کی۔

دوران اجلاس وزیراعظم کو بریفنگ میں بتایا گیا کہ اسلام آباد میں 16 سہولت سٹالز، 5 رمضان بازار، 18 فیئر پرائس شاپس قائم اور دیگر سہولیات فراہم کی گئی ہیں، گھی، انڈے، دالیں، چینی، چکن اور دیگر اشیائے خورونوش مارکیٹ ریٹ سے کم نرخوں پر فراہم کی جار رہی ہیں۔

بریفنگ میں بتایا گیا کہ 12اشیائے ضروریہ کی سستے نرخوں پر فراہمی یقینی بنانے کیلئے ڈپارٹمنٹل سٹورز میں خصوصی ڈی سی کاؤنٹر کا قیام عمل میں لایا گیا ہے، ماہ صیام کے آغاز سے اب تک منافع خوروں کیخلاف 4 ہزار 915 انسپیکشنز، 785 گرفتاریاں اور 7لاکھ 28 ہزار روپے کے جرمانے عائد کیے جا چکے ہیں۔

انتظامیہ کی جانب سے وزیراعظم کو مزید بتایا گیا کہ پرائس کنٹرول مجسٹریٹس کی کارکردگی کی نگرانی کیلئے آن لائن ایپ کا استعمال کیا جا رہا ہے، بیت المال کے تحت وفاقی دارالحکومت میں 8 مقامات پر مستحق روزہ داروں کو افطاری کی سہولت فراہم کی جا رہی ہے۔

دوران اجلاس گفتگو کرتے ہوئے وزیراعظم شہباز شریف کا کہنا تھا کہ یقینی بنایا جائے کوئی بھی منافع خور سزا سے بچ نہ پائے اور کوئی بے گناہ زیر عتاب نہ آئے، رمضان المبارک کے دوران عوام کو زیادہ سے زیادہ ریلیف فراہم کرنے کیلئے پرعزم ہیں۔

شہبازشریف نے کو ہدایت دی کہ عوامی نمائندے اور وفاقی وزراء سستی اشیائے ضروریہ کی عوام کو فراہمی کیلئے اسلام آباد میں قائم رمضان بازار ، سہولت سٹالز اور دیگر مختص مقامات کے دورے یقینی بنائیں، پرائس کنٹرول کے نظام کی مسلسل نگرانی کی جائے تاکہ عوام کو ریلیف کی فراہمی میں کوئی کمی نہ آئے۔