سپریم کورٹ میں کل چیف جسٹس یحییٰ آفریدی کی سربراہی میں ریگولر بینچ سمیت دو آئینی بنچز متعدد اہم کیسز سماعت کی سماعت کریں گے۔
چیف جسٹس آف پاکستان جسٹس یحییٰ آفریدی کی سربراہی میں تین رکنی ریگولر بنچ میں 9 مئی کے کیسز کی سماعت ہوگی، چیف جسٹس کی سربراہی میں تشکیل بنچ میں جسٹس مسرت ہلالی اور جسٹس گل حسن اورنگزیب شامل ہیں۔
خیال رہے کہ نو مئی واقعات میں ملوث ملزمان کی ضمانت منسوخی کے لیے پنجاب حکومت کی جانب سے سپریم کورٹ میں اپیلیں دائر کی گئی ہیں۔
کل پیر کے روز عدالت عظمیٰ میں پہلا آئینی بنچ ٹیکس کیسز پر صبح ساڑھے نو بجے سماعت کرے گا، جسٹس امین الدین خان کی سربراہی میں پانچ رکنی آئینی بنچ ٹیکس کیسز پر سماعت کرے گا۔
بنچ میں جسٹس جمال خان مندوخیل، جسٹس محمد علی مظہر، جسٹس حسن اظہر رضوی اور جسٹس عامر فاروق شامل ہیں،آئینی بنچ 500 سے زائد انکم ٹیکس 2011 کیخلاف دائر درخواستوں پر سماعت کرے گا۔
علاوہ ازیں جسٹس امین الدین خان کی سربراہی میں سات رکنی آئینی بنچ فوجی عدالتوں میں سویلینز کے ٹرائل کیخلاف انٹراکورٹ اپیل پر سماعت کرے گا،جسٹس جمال مندوخیل، جسٹس محمد علی مظہر، جسٹس مسرت ہلالی، جسٹس نعیم اختر افغان، جسٹس شاہد بلال حسن اور جسٹس حسن اظہر رضوی بنچ کا حصہ ہوں گے۔
