عدالت کا قاضی فائز عیسیٰ بارے بڑا فیصلہ

عدالت کا قاضی فائز عیسیٰ بارے بڑا فیصلہ

January, 9 2025

اسلام آباد:(سنو نیوز) سپریم کورٹ کے جسٹس جمال مندوخیل نے سابق چیف جسٹس قاضی فائز عیسیٰ اور جسٹس سردار طارق مسعود کے خلاف دائر اپیل کو غیر موثر قرار دیتے ہوئے خارج کر دیا۔

یہ اپیل ایڈووکیٹ محمد شاہد رانا نے رجسٹرار آفس کے اعتراضات کے خلاف دائر کی تھی۔

ایڈووکیٹ شاہد رانا نے اپنی درخواست میں سابق چیف جسٹس اور جسٹس سردار طارق کے خلاف کارروائی کا مطالبہ کیا تھا۔ درخواست میں مؤقف اختیار کیا گیا تھا کہ پریکٹس اینڈ پروسیجر ایکٹ پر حکم امتناع ہونے کے باوجود مقدمات کی سماعت کی گئی، جو قوانین کی خلاف ورزی ہے۔

رجسٹرار آفس نے درخواست پر اعتراضات عائد کرتے ہوئے اسے واپس کر دیا تھا، جس کے بعد ایڈووکیٹ شاہد رانا نے اعتراضات کے خلاف چیمبر اپیل دائر کی۔ تاہم، جسٹس جمال مندوخیل نے اس اپیل کو غیر موثر قرار دیتے ہوئے مسترد کر دیا۔

یہ فیصلہ اس بات کی تصدیق کرتا ہے کہ رجسٹرار آفس کے اعتراضات برقرار ہیں اور اپیل گزار کی جانب سے اٹھائے گئے نکات مزید کارروائی کے لیے موزوں نہیں سمجھے گئے۔