محکمہ ماحولیات پنجاب کے ڈائریکٹر جنرل عمران حامد شیخ نے اس اقدام کا مقصد فضائی آلودگی کی سطح کو کم کرنا قرار دیا۔

 

 

گرین لاک ڈاؤن کے تحت لاہور کے کئی اہم علاقوں میں سخت پابندیاں نافذ کی گئی ہیں۔ ان میں ڈیوس روڈ، ایجرٹن روڈ، ڈیورنڈ روڈ، اور کشمیر روڈ شامل ہیں۔ اسی طرح شملہ پہاڑی سے گلشن سینما، ایبٹ روڈ، شملہ پہاڑی سے ریلوے اسٹیشن، اور ایمپریس روڈ پر بھی یہی پابندیاں عائد کی گئی ہیں۔

 

 اس کے علاوہ کوئین میری روڈ اور اس کے ملحقہ علاقوں کو بھی آلودگی میں اضافے کے خطرے کے باعث لاک ڈاؤن میں شامل کیا گیا ہے۔

 

 

نوٹیفکیشن کے مطابق، ان علاقوں میں تعمیراتی سرگرمیوں پر مکمل پابندی عائد کر دی گئی ہے۔ اس کے علاوہ چنگ چی رکشے اور کمرشل جنریٹرز کا استعمال بھی ممنوع قرار دیا گیا ہے۔ رات 8 بجے کے بعد باربی کیو اور کھلے فوڈ پوائنٹس بھی بند رہیں گے تاکہ فضائی آلودگی میں مزید اضافہ نہ ہو۔

 

 

حکومت نے واضح کیا ہے کہ گرین لاک ڈاؤن کی خلاف ورزی کرنے والوں کے خلاف سخت قانونی کارروائی کی جائے گی۔ یہ اقدامات لاہور میں موسم سرما کے دوران اسموگ اور آلودگی سے نمٹنے کے لیے کیے گئے ہیں تاکہ شہریوں کی صحت کو بہتر ماحول فراہم کیا جا سکے۔