یہ اعلان وزیر اعظم شہباز شریف کے سعودی عرب کے دورے کے دوران کیا گیا۔ انہوں نے اس موقع پر کہا کہ سعودی عرب کے ساتھ اقتصادی شراکت داری پاکستان کی ترقی اور خوشحالی کی جانب اہم قدم ہے۔

 

 

وزیر اعظم نے سعودی عرب کے فیوچر انویسٹمنٹ اقدام کو ایک اہم منصوبہ قرار دیا اور پاکستان کی جانب سے سعودی عرب کی ترقیاتی ضروریات کے مطابق ہنر مند افرادی قوت فراہم کرنے کا وعدہ کیا۔ ان کا کہنا تھا کہ سعودی عرب کی جانب سے ملنے والی سرمایہ کاری دونوں ممالک کے تعلقات کو مزید مضبوط بنائے گی۔

 

 

سعودی وزیر سرمایہ کاری خالد بن عبدالعزیز الفالح نے اس موقع پر کہا کہ سعودی عرب لاکھوں پاکستانیوں کو اپنا دوسرا گھر سمجھتا ہے۔ انہوں نے کہا کہ سعودی عرب پاکستان کے ساتھ اقتصادی تعلقات کو مزید مستحکم بنانے کے لیے مختلف منصوبوں پر تیزی سے کام کر رہا ہے اور پاکستان میں سرمایہ کاری کو اہمیت دے رہا ہے۔

 

 

وزیر اعظم ہاؤس سے جاری پریس ریلیز کے مطابق، اکتوبر 2024 ء میں سعودی سرمایہ کاری وفد کے پاکستان کے دورے کے دوران 2.2 ارب ڈالر کے معاہدوں پر دستخط ہوئے تھے۔ اب حالیہ 600 ملین ڈالر کی سرمایہ کاری کے اضافے سے مفاہمتی یادداشتوں اور معاہدوں کی تعداد 34 تک پہنچ چکی ہے، جن میں سے 5 منصوبے پہلے ہی عملدرآمد کے مرحلے میں ہیں۔

 

 

وزیر اعظم شہباز شریف نے کہا کہ سعودی عرب نے معاہدوں پر فوری عمل درآمد شروع کر دیا ہے۔ ان کا کہنا تھا کہ سعودی ولی عہد کے ساتھ انتہائی نتیجہ خیز ملاقات ہوئی جس میں انہوں نے پاکستان کے مالی معاملات میں سعودی تعاون پر شکریہ ادا کیا۔ انہوں نے مزید کہا کہ سعودی عرب پاکستان میں جدید ہاسپٹل کمپلیکس کی تعمیر سمیت زراعت اور دیگر شعبوں میں بھی سرمایہ کاری کر رہا ہے۔

 

 

دورے کے دوران وزیر اعظم نے سعودی عرب میں مقیم پاکستانی مزدوروں کی فلاح اور حقوق کے حوالے سے بھی سعودی حکام کے ساتھ بات چیت کی۔ انہوں نے سعودی حکومت سے درخواست کی کہ پاکستانی مزدوروں کو مزید سہولتیں فراہم کی جائیں تاکہ دونوں ممالک کے مابین تعلقات مزید مضبوط ہوں۔

 

 

سعودی وزیر سرمایہ کاری خالد بن عبدالعزیز الفالح نے اپنے حالیہ دورہ پاکستان میں بہترین میزبانی پر پاکستان کا شکریہ ادا کیا اور کہا کہ سعودی ولی عہد محمد بن سلمان پاکستان کو علاقائی اقتصادی شراکت داری میں خصوصی حیثیت دے رہے ہیں۔ انہوں نے بتایا کہ ان کے حالیہ دورے میں زراعت، صحت اور دیگر شعبوں میں سرمایہ کاری کے لئے 27 معاہدے طے پائے ہیں، جن میں سے کئی منصوبے تیزی سے تکمیل کی جانب گامزن ہیں۔

 

 

وزیر اعظم پاکستان نے سعودی عرب کی سرمایہ کاری کو پاکستان کی معاشی استحکام کے لئے اہم قرار دیا۔ انہوں نے کہا کہ سعودی سرمایہ کاری پاکستان کے مختلف شعبوں میں روزگار کے نئے مواقع پیدا کرے گی اور پاکستانی معیشت کو مستحکم کرنے میں اہم کردار ادا کرے گی۔