ترجمان پنجاب پولیس کے مطابق پنجاب پولیس نے ایک بار پھر بھرپور قوت سے خوارجی دہشت گردوں کا حملہ ناکام بنا دیا جبکہ حملہ آور فرار ہوگئے، 12 سے 14 خوارجی دہشت گردوں نے رات کی تاریکی کا فائدہ اٹھا کر قبول خیل چیک پوسٹ پر راکٹ لانچرز اور ہینڈ گرنیڈز سے حملہ کیا۔

انہوں نے کہا کہ چیک پوسٹ پر تعینات پنجاب پولیس کے جوان الرٹ تھے، شدید جوابی فائرنگ کے نتیجے میں بزدل دہشت گردوں کا حملہ پسپا کر دیا، ڈی پی او میانوالی اختر فاروق، ڈی ایس پی عیسی خیل اور ایس ایچ او بھاری نفری کے ساتھ پولیس چیک پوسٹ پر موجود ہیں۔

ترجمان پنجاب پولیس نے کہا کہ حملے میں 2 پولیس جوان معمولی زخمی ہوئے ہیں، علاقے میں سرچ آپریشن جاری ہے، مفرور دہشت گردوں کو بھاری نقصان پہنچنے کے امکانات ہیں۔ آئی جی پنجاب ڈاکٹر عثمان انور نے دہشت گردوں کا حملہ ناکام بنانے پر پولیس چیک پوسٹ قبول خیل کے بہادر اہلکاروں کو شاباش دی۔

آئی جی پنجاب ڈاکٹر عثمان انور کا کہنا تھا کہ گزشتہ چند ماہ میں پنجاب پولیس پر دہشت گردوں کا یہ 09 واں حملہ ہے جو ناکام بنایا گیا، چند ماہ کے دوران دہشت گردوں کا یہ چوتھا حملہ ہے جو ناکام بنایا گیا، پنجاب پولیس آئندہ بھی دشمن کے ناپاک عزائم کو ناکام بنائے گی، پنجاب پولیس بین الصوبائی سرحدی چوکیوں پر دہشت گردوں کے خلاف سیسہ پلائی دیوار ہے۔

آر پی او نے زخمی اہلکاروں سے ملاقات کی۔ اس موقع پر ڈی پی او اختر فاروق بھی ہمراہ تھے۔ ڈی پی او اختر فاروق حملے کی اطلاع ملتے ہی چوکی پر پہنچے اور اہلکاروں کا حوصلہ بڑھایا۔