بارشوں نے ناران کاغان میں تباہی مچا دی

August, 1 2024

مانسہرہ:(ویب ڈیسک) مانسہرہ میں مون سون کی بارشوں کا سلسلہ جاری ہے، جس نے ناران کاغان میں تباہی مچا دی ہے۔

ناران اور کاغان کی سڑکیں ملیا میٹ ہو گئی ہیں اور مہانڈری منور نالہ میں پانی کے اضافے کی وجہ سے درجنوں دکانیں برساتی ریلے کی نظر ہو چکی ہیں۔

مہانڈری میں شدید بارشوں اور طغیانی کے باعث مقامی لوگوں کی جانب سے لگایا گیا عارضی پل بہہ گیا ہے۔

وادی کاغان کا زمینی رابطہ منقطع ہونے کی وجہ سے اشیائے خورد و نوش کی قلت پیدا ہو گئی ہے۔

مہانڈری میں بارش سے منور نالہ بپھر گیا ہے اور مہانڈری بازار کی دکانیں سلابی ریلے میں بہہ گئی ہیں۔

جھلکڈ میں سیاح سیلابی ریلے میں پھنس گئے تھے، جنہیں مقامی لوگوں نے اپنی مدد آپ کے تحت بحفاظت نکال لیا۔

سیلابی ریلے میں پھنسے سیاحوں کی گاڑیوں کے شیشے توڑ کر انہیں بحفاظت نکالا گیا۔

مہانڈری منور نالہ میں پانی کا بہاؤ بہت زیادہ بڑھ گیا ہے اور راستہ کھولنے کے لیے رکھے گئے پائپ بھی پانی بہا کر لے گیا ہے۔

ضرور پڑھیں