خدیجہ شاہ نے منگل کو اپنے انسٹاگرام اکاؤنٹ پر اعلان کیا کہ انہیں پاکستان کے سابق وزیراعظم اور پی ٹی آئی کے بانی عمران خان نے پارلیمنٹ میں پارٹی کی نمائندگی کے لیے نامزد کیا ہے۔

 

 انہوں نے کہا کہ عمران خان کی نامزدگی ان کے لیے ایک اعزاز ہے اور وہ ان کی شکرگزار ہیں۔

 

 

خدیجہ شاہ نے کہا کہ امریکی شہریت ترک کرنا، جو تحفظ اور آزادی فراہم کرتی ہے، آسان فیصلہ نہیں تھا۔ تاہم، پاکستان ان کا مادر وطن ہے اور وہ اپنے ملک اور عوام کو نہیں چھوڑ سکتیں۔ انہوں نے کہا کہ انہوں نے اپنی زندگی پاکستان میں گزاری ہے اور یہ ان کا گھر ہے۔

 

 

لگژری فیشن برینڈ  اعلان  کی بانی خدیجہ شاہ کو 9 مئی کے واقعات کے بعد گرفتار کیا گیا تھا۔ انہیں عمران خان کی سرگرم حمایتی ہونے کی بنا پر چار کیسز میں گرفتار کیا گیا اور وہ چھ ماہ تک کوٹ لکھپت جیل لاہور اور بعد ازاں کوئٹہ میں قید رہیں۔

 

 

نومبر 2023 ءمیں خدیجہ شاہ کو ان مقدمات میں ضمانت ملی۔ بعد ازاں، لاہور کی انسداد دہشت گردی کی عدالت نے انہیں کوئٹہ پولیس کے حوالے کیا، جہاں انہیں قتل اور اقدامِ قتل کے الزامات کے تحت گرفتار کیا گیا تھا۔ دسمبر 2023 ءمیں کوئٹہ کی انسداد دہشت گردی کی عدالت نے عدم ثبوت کی بنا پر انہیں بری کردیا۔

 

 

خدیجہ شاہ کو مجموعی طور پر سات ماہ کے بعد جیل سے رہائی ملی۔ ان پر پی ٹی آئی کارکنوں کو 9 مئی کو پُرتشدد احتجاج پر اُکسانے کا الزام تھا، جس پر انہیں دسمبر 2023 ء میں لاہور سے گرفتار کر کے بلوچستان منتقل کیا گیا تھا۔

 

 

خدیجہ شاہ پاکستان کے سابق آرمی چیف جنرل آصف نواز جنجوعہ کی نواسی اور سابق مشیر خزانہ سلمان شاہ کی بیٹی ہیں۔ انہیں لاہور میں کور کمانڈر ہاؤس کے جلاؤ گھیراؤ اور عسکری ٹاور کے مقدمات میں گرفتار کیا گیا تھا اور نو مئی کے واقعات کے دو ہفتے بعد حراست میں لیا گیا تھا۔