چودھری محمد یاسین، ایم ایل اے اور صدر پیپلز پارٹی آزاد کشمیر، اور سردار عتیق احمد خان، سابق وزیر اعظم آزاد کشمیر اور سربراہ مسلم کانفرنس آزاد کشمیر، نے اپنے وڈیو پیغام میں کہا ہے کہ 5 اگست کو دنیا بھر اور سرحد کے دونوں اطراف کشمیری بھارتی غیر قانونی اقدام کے خلاف یوم احتجاج اور یوم سیاہ کے طور پر مناتے ہیں۔

 

انہوں نے کہا کہ پی ٹی آئی کی جانب سے مقبوضہ جموں کشمیر میں آرٹیکل 370 کی معطلی کے دن سیاسی احتجاج کی کال انتہائی قابل مذمت ہے۔ پی ٹی آئی کا وطیرہ رہا ہے کہ قومی یکجہتی کے دنوں پر سیاسی دکان چمکانے کی کوشش کی جاتی ہے۔ انہوں نے مزید کہا کہ پی ٹی آئی نے یاسین ملک کو سزا ہونے کے دن بھی اسی طرح ایک سیاسی اجتماع کا انعقاد کیا تھا۔

 

کشمیری قیادت نے کہا کہ پی ٹی آئی ہمیشہ ریاستی مفادات اور ریاست کے ایجنڈے سے ٹکراؤ کے اقدامات کرتی ہے۔ پی ٹی آئی دور میں پاکستانی وزیر خارجہ اور وزیر اعظم عمران خان کشمیر کا مقدمہ عالمی سطح پر لڑنے میں ناکام رہے۔ 5 اگست کو پی ٹی آئی کی جانب سے اس احتجاج کی کال انتہائی تشویشناک ہے اور قومی احتجاج کو متنازعہ اور غیر مؤثر بنانے کی سازش ہے۔ انہوں نے مزید کہا کہ پی ٹی آئی کا احتجاج کا اعلان قومی سلامتی پالیسی سے متصادم ہے۔