کانگو: دو ہزار سے زائد افراد ایبولا وائرس کا شکار، 754 ہلاک
نیوز ایجنسی کی رپورٹ کے مطابق ایبولا کے نئے کیسز سامنے آنے کے بعد وبا کانگو کے پانچ صوبوں تک پھیل گئی ہے جس کے باعث محکمہ صحت کی تشویش میں مزید اضافہ ہوگیا۔
متاثرہ علاقوں میں وائرس کی روک تھام، مریضوں کی شناخت اور مشتبہ افراد کی نگرانی کے لیے ہنگامی بنیادوں پر اقدامات کیے جا رہے ہیں۔
رپورٹ میں بتایا گیا ہے کہ ایبولا وائرس سے متاثر ہونے والے 366 مریض علاج کے بعد صحت یاب ہو چکے ہیں۔
دوسری جانب 753 مریض اب بھی مختلف طبی مراکز اور مخصوص آئسولیشن وارڈز میں زیر علاج ہیں، متعدد مریضوں کی حالت تشویشناک ہونے کے باعث ہلاکتوں میں مزید اضافے کا خدشہ ظاہر کیا جا رہا ہے۔
نیوز ایجنسی کے مطابق کانگو میں ایبولا کی حالیہ وبا کا آغاز 15 مئی کو ہوا تھا، جس کے بعد وائرس تیزی سے مختلف علاقوں میں پھیلتا چلا گیا۔
متاثرہ علاقوں میں شہریوں کو احتیاطی تدابیر اختیار کرنے اور علامات ظاہر ہونے کی صورت میں فوری طور پر طبی حکام سے رابطہ کرنے کی ہدایت کی گئی ہے۔
یہ بھی پڑھیں: خواتین میں شوگر کا مرض تیزی سے کیوں بڑھ رہا ہے؟
حکام محکمہ صحت نے بیماری کے مزید پھیلاؤ کو روکنے کے لیے نگرانی اور تشخیصی نظام کو مضبوط بنانے کی ضرورت پر زور دیتےہوئے کہا ہے کہ متاثرہ افراد کو جلد از جلد شناخت کرکے الگ کرنا اور ان کے رابطے میں رہنے والے لوگوں کی نگرانی وائرس پر قابو پانے کے لیے انتہائی ضروری ہے۔
طبی ٹیمیں متاثرہ صوبوں میں مریضوں کے علاج، مشتبہ کیسز کی جانچ اور عوام میں آگاہی پیدا کرنے کے لیے کام کر رہی ہیں۔
حکام نے شہریوں پر زور دیا ہے کہ وہ افواہوں سے گریز کریں اور صرف سرکاری طبی ہدایات پر عمل کریں۔
