کراچی میں ایم پاکس کا ایک اور کیس رپورٹ ہوگیا
اسپتال انتظامیہ کے مطابق گلستانِ جوہر کا 40 سالہ شخص ایم پاکس سے متاثر پایا گیا ہے، جس کی تصدیق پی سی آر ٹیسٹ کے ذریعے کی گئی۔ متاثرہ مریض کو فوری طور پر نیپا اسپتال کے آئسولیشن وارڈ میں منتقل کر دیا گیا، جہاں اسے خصوصی طبی نگرانی میں رکھا گیا ہے۔
انتظامیہ کا کہنا ہے کہ مریض کی کوئی حالیہ بیرون ملک سفر کی ہسٹری موجود نہیں، تاہم اس کے باوجود وائرس کی تصدیق ہونا صحت حکام کیلئے تشویش کا باعث ہے۔
ماہرین صحت کے مطابق ایسے کیسز مقامی سطح پر وائرس کے پھیلاؤ کے خدشات کو بڑھا سکتے ہیں۔
ہسپتال ذرائع کے مطابق نیپا اسپتال میں اب تک ایم پاکس کے مجموعی طور پر 7 کیسز رپورٹ ہو چکے ہیں، جبکہ کراچی بھر میں یہ تعداد بڑھ کر 9 تک پہنچ گئی ہے۔ تمام مریضوں کو آئسولیشن میں رکھا گیا ہے اور ان کی حالت پر مسلسل نظر رکھی جا رہی ہے۔
یہ بھی پڑھیں:خطرناک ہنٹا وائرس کا پھیلاؤ، 3 افراد ہلاک
محکمہ صحت کے حکام نے شہریوں کو احتیاطی تدابیر اختیار کرنے کی ہدایت کی ہے، خاص طور پر ہجوم والی جگہوں پر ماسک کے استعمال اور صفائی کا خیال رکھنے پر زور دیا گیا ہے، بروقت تشخیص اور احتیاطی اقدامات اس بیماری کے پھیلاؤ کو روکنے میں اہم کردار ادا کر سکتے ہیں۔
