ہیٹ اسٹروک سے بچاؤ کیلئے حفاظتی اقدامات ناگزیر قرار
طبی ماہرین کے مطابق سخت گرمی میں احتیاط نہ کرنے سے ہیٹ اسٹروک جان لیوا ثابت ہو سکتا ہے، اس لیے شہریوں کو غیر ضروری طور پر دھوپ میں نکلنے سے گریز کرنا چاہیے۔
ماہرین کا کہنا ہے کہ ہیٹ اسٹروک کی اہم علامات میں جسم کا درجہ حرارت بہت زیادہ ہو جانا، سر درد، چکر آنا، گھبراہٹ، شدید کمزوری، بے ہوشی جیسی کیفیت، دل کی دھڑکن تیز ہونا، سانس پھولنا، جلد کا گرم اور خشک ہونا شامل ہیں۔
اگر کسی شخص میں یہ علامات ظاہر ہوں تو فوری طور پر اسے سایہ دار یا ٹھنڈی جگہ منتقل کیا جائے اور طبی امداد فراہم کی جائے۔
ہیٹ اسٹروک سے بچاؤ کے لیے شہریوں کو مشورہ دیا گیا ہے کہ وہ صبح 11 بجے سے سہ پہر 3 بجے تک خاص طور پر دھوپ میں نکلنے سے پرہیز کریں، کیونکہ اس دوران سورج کی شدت زیادہ ہوتی ہے۔
اسی طرح زیادہ سے زیادہ پانی، مشروبات اور او آر ایس کا استعمال کیا جائے تاکہ جسم میں پانی کی کمی نہ ہو۔
ماہرین کے مطابق ہلکے رنگ کے ڈھیلے کپڑے پہننا بھی گرمی کے اثرات کم کرنے میں مددگار ثابت ہوتا ہے، بچوں، بزرگوں اور مریضوں کا خصوصی خیال رکھنے کی ضرورت ہے کیونکہ یہ افراد شدید گرمی سے جلد متاثر ہو سکتے ہیں۔
یہ بھی پڑھیں: خواتین میں شوگر کا مرض تیزی سے کیوں بڑھ رہا ہے؟
ماہرین نے شہریوں سے اپیل کی کہ اگر کسی شخص میں ہیٹ اسٹروک کی علامات دیکھی جائیں تو اسے فوری طور پر پانی پلایا جائے، ٹھنڈی جگہ بٹھایا جائے، جسم کو ٹھنڈا کرنے کی کوشش کی جائے اور تاخیر کے بغیر قریبی ہسپتال یا طبی مرکز منتقل کیا جائے۔
طبی ماہرین نے مزید کہا ہے کہ بروقت احتیاط اور فوری امداد قیمتی جانیں بچا سکتی ہے۔
