بالی ووڈ کے معروف اداکار مشتاق خان انتقال کر گئے
وہ اپنی طویل فنی زندگی کے دوران متعدد مقبول ہندی فلموں میں معاون کردار ادا کرچکے تھے اور اپنی منفرد اداکاری کے باعث ناظرین میں پہچانے جاتے تھے۔
مشتاق خان پھیپھڑوں کے کینسر میں مبتلا تھے اور گزشتہ کچھ عرصے سے زیرِ علاج تھے، طبیعت زیادہ خراب ہونے پر انہیں ممبئی کے ناناوتی اسپتال منتقل کیا گیا، جہاں انہیں انتہائی نگہداشت کے شعبے میں رکھا گیا تھا،تاہم وہ جمعرات کی شام انتقال کر گئے۔
مشتاق خان نے اپنے فلمی کیریئر کا آغاز 1980 میں ریلیز ہونے والی فلم البرٹ پنٹو کو غصہ کیوں آتا ہے سے کیا، تین دہائیوں سے زائد عرصے پر محیط اپنے کیریئر کے دوران انہوں نے ہندی سنیما کی متعدد کامیاب فلموں میں کام کیا۔
اداکار کو ویلکم، غدر: ایک پریم کتھا، غدر 2 اور استری 2 سمیت کئی معروف فلموں میں یادگار معاون کردار ادا کرنے کے حوالے سے جانا جاتا تھا۔ اس کے علاوہ وہ عاشقی، مجھ سے شادی کرو گی اور ہم ہیں راہی پیار کے جیسی مقبول فلموں کا بھی حصہ رہے۔
مشتاق خان نے صرف فلموں تک خود کو محدود نہیں رکھا بلکہ ٹیلی ویژن پر بھی اپنی اداکاری کے جوہر دکھائے۔ مختلف نوعیت کے معاون کرداروں کو اپنی منفرد اداکاری سے نمایاں بنانا ان کی فنی شناخت کا اہم حصہ تھا۔
یہ بھی پڑھیں:معروف گلوکار عمیر جسوال کے والد انتقال کر گئے
ان کے انتقال کی خبر سامنے آنے کے بعد بھارتی فلم اور ٹیلی ویژن انڈسٹری سے وابستہ افراد اور مداحوں کی جانب سے افسوس اور تعزیت کا اظہار کیا جا رہا ہے، مشتاق خان کی طویل فنی خدمات کو ان کے مداح اور ساتھی فنکار یاد کر رہے ہیں۔
