رجب بٹ کی ساس لبنیٰ جبین نے فوٹو اینڈ ویڈیو شیئرنگ ایپ انسٹاگرام پر اسٹوری کے ذریعے ایک وضاحتی بیان میں طلاق کی خبروں کی تردید کرتے ہوئے کہا کہ رجب بٹ اور ایمان کا رشتہ انشااللہ برقرار ہے ، دونوں میاں بیوں کے درمیان جو بھی مسائل ہیں انہیں باہمی مشاورت اور خاندانی سطح پر حل کیا جا رہا ہے۔
انہوں نے لکھا کہ ایمان اور رجب نے اپنی شادی کو جاری رکھنے کا واضح ارادہ ظاہر کیا ہے اور خاندان کی اولین ترجیح ان کے بیٹے کیوان سلطان کی بھلائی اور بہتر مستقبل ہے۔
لبنیٰ جبین نے اپنے بیان میں سوشل میڈیا صارفین سے اپیل کی کہ وہ غیر مصدقہ خبروں اور سوشل میڈیا پر ہونے والی قیاس آرائیوں پر یقین نہ کریں، خاندانی معاملات نجی ہوتے ہیں اور انہیں عوامی بحث، دباؤ یا سوشل میڈیا ٹرینڈز کا حصہ نہیں بنایا جانا چاہیے۔
ان کا کہنا تھا کہ پرائیویسی کی خلاف ورزی اور دھمکی آمیز رویہ نہ صرف غیر اخلاقی ہے بلکہ اس کے قانونی نتائج بھی ہو سکتے ہیں۔
یہ بھی پڑھیں: جوا ایپس پروموشن کیس، رجب بٹ اور ندیم مبارک کی ضمانت میں توسیع
رجب بٹ کی ساس نے عوام سے احترام، صبر اور ہمدردی کا مظاہرہ کرنے اور خاندان کے لیے دعا کرنے کی درخواست کی تاکہ تمام معاملات وقار، سکون اور باہمی سمجھ بوجھ کے ساتھ حل ہو سکیں۔
واضح رہے کہ حال ہی میں رجب بٹ نے ایمان کے بھائی شیخ عون پر سخت تنقید کرتے ہوئے الزام عائد کیا تھا کہ ذاتی خاندانی مسائل کو سوشل میڈیا پر اچھالا جا رہا ہے اور جھوٹی معلومات پھیلائی جا رہی ہیں، ان کی اہلیہ اور بیٹا کسی بھی قسم کی ہمدردی یا توجہ حاصل کرنے کا ذریعہ نہیں ہیں۔
بعد ازاں لبنیٰ جبین نے مزید وضاحت کرتے ہوئے کہا کہ ایمان اور کیوان کو بدنام کرنے کی منظم کوششیں کی گئیں، جن میں حقائق کو توڑ مروڑ کر پیش کرنا اور بے بنیاد الزامات شامل ہیں۔
دوسری جانب شیخ عون نے ایک ویڈیو پیغام میں کہا کہ ان کی خواہش ہے کہ ایمان، کیوان اور رجب بٹ ایک خوشحال اور متحد خاندان کی صورت میں رہیں اور وہ خاندان کی خوشی کے لیے اپنے اختلافات کو ختم کرنے کے لیے تیار ہیں۔
