ڈکی بھائی نے جوڈیشل مجسٹریٹ کی جانب سے جسمانی ریمانڈ میں توسیع کے فیصلے کو چیلنج کرتے ہوئے اپیل دائر کر دی ہے۔ ان کے وکیل کے ذریعے ہفتے کے روز یہ اپیل سیشن کورٹ میں جمع کرائی گئی، جسے عدالت نے سماعت کیلئے منظور کرلیا۔

عدالت نے نیشنل سائبر کرائم انویسٹی گیشن ایجنسی (NCCIA) کو نوٹس جاری کرتے ہوئے پیر تک جواب طلب کیا ہے۔ ڈکی بھائی کی درخواست میں مؤقف اختیار کیا گیا کہ مجسٹریٹ نے حقائق کو نظرانداز کرتے ہوئے ریمانڈ میں توسیع کی، لہٰذا اس حکم کو کالعدم قرار دیا جائے۔

اسی دوران عدالت نے ڈکی بھائی کی اہلیہ عروب جتوئی کی عبوری ضمانت میں بھی 15 ستمبر تک توسیع کردی اور این سی سی آئی اے کو ہدایت دی کہ اس دوران انہیں گرفتار نہ کیا جائے۔ عدالت نے ایجنسی کو اگلی سماعت پر جامع تفتیشی رپورٹ جمع کرانے کا بھی حکم دیا۔

دوسری جانب این سی سی آئی اے نے متعدد مشہور یوٹیوبرز اور ٹک ٹاکرز کو غیرقانونی آن لائن بیٹنگ ایپس کی تشہیر کے الزام میں بھی طلب کرلیا ہے۔

یہ بھی پڑھیں:ڈکی بھائی کے جسمانی ریمانڈ میں 4 دن توسیع

رپورٹس کے مطابق مدثر حسن، محمد انس علی، اقرا کنول اور محمد حسنین شاہ کو 2 ستمبر 2025 کو لاہور دفتر میں پیش ہونے کی ہدایت جاری کی گئی ہے۔

تحقیقاتی ذرائع کا کہنا ہے کہ ان انفلوئنسرز نے غیرقانونی جوا اور آن لائن ٹریڈنگ ایپس کو پرکشش انداز میں فروغ دیا اور نوجوانوں کو دھوکے سے راغب کیا۔