ایونٹ کی افتتاحی تقریب میں پنجاب کے وزیر برائے صنعت ، تجارت و سرمایہ کاری چودھری شافع حسین نے بطور مہمان خصوصی شرکت کی جبکہ چیف ایگزیکٹو ٹی ڈی اے پی فیض احمد، سیکرٹری ٹی ڈی اے پی شہریار تاج، لاہور چیمبر آف کامرس اینڈ انڈسٹری کے صدر ابوذر شاد اور ایف پی سی سی آئی کے ریجنل چیئرمین و نائب صدر زین افتخار چودھری بھی موجود تھے۔

ہیلتھ انجینئرنگ اینڈ منرل فیشن شو لاہور میں ماڈلز نے دیدہ زیب ملبوسات زیب تن کیے ، ایونٹ میں جواہرات اور زیورات کو نئے انداز میں پیش کیا گیا، جس ذریعے قومی ٹیلنٹ اور ورثے کو عالمی پلیٹ فارم پر سامنے لایا گیا۔

ماڈلز نے ملک کے کچھ مشہور جیولرز کے ڈیزائنز پہن کر ریمپ پر واک کی، شو میں جیولری برانڈز اور ٹاپ فیشن ڈیزائنرز کے درمیان بی ٹو بی تعاون کو پیش کیا گیا۔

فیشن ٹائیکون ایچ ایس وائے ، وسیم جیولرز، منیب نواز کے ساتھ الماس جیولرز، زونیہ انوار کے ساتھ ہیری ٹیج جیولرز، بلاکسٹری کے ساتھ ڈیوائن جیولرز، نیلوفر اور دیگر ڈیزائنرز نے اپنی کاریگری کو مہارت سے پیش کیا تو دیکھنے والے بے ساختہ داد دینے پر مجبور ہو گئے۔

فیشن شو نے مقامی ڈیزائنرز اور کاریگروں کو عالمی منڈیوں کے ساتھ براہ راست تعلقات استوار کرنے کا ایک قیمتی موقع فراہم کیا، بہت سے لوگوں کے لیے اس پلیٹ فارم نے طویل مدتی برآمدی شراکت داری اور سرحد پار تعاون کا بھی آغاز کیا۔

ہیلتھ انجینئرنگ ومنرلز شو میں70 سے زائد ممالک کے 900 سے زائد غیر ملکی خریدار اور درآمد کنندگان نے شرکت کی اور تقریباً 200 پاکستانی نمائش کنندگان سے ملاقاتیں کیں،

نمائش میں 20 سے زائد شعبوں کی مصنوعات پیش کی گئیں جن میں دواسازی، سرجیکل آلات، زرعی مشینری، تعمیراتی آلات، آٹو پارٹس، کھیلوں کا سامان، موبائل ڈیوائسز، کیمیکلز، برقی آلات، کاسمیٹکس، کٹلری، ہنڈی کرافٹس ، قیمتی پتھراور زیورات شامل تھے۔

شو کا نمایاں پہلو "منرلز انویسٹمنٹ پویلین" اور "جیمز اینڈ جیولری فیشن شو" تھا جس سے پاکستان کے معدنی وسائل کے پائیدار استعمال اور فیشن انڈسٹری میں ترقی کی جھلک نمایاں ہوئی۔

تقریب کے بعد ٹی ڈی اے پی کے حکام نے سری لنکا، متحدہ عرب امارات سمیت دیگر ممالک کے تجارتی وفود سے ملاقاتیں کیں اور دو طرفہ تجارت کے فروغ پر تبادلہ خیال کیا گیا،ٹی ڈی اے پی نے شرکت کرنے والے ممالک کے ریگولیٹری اداروں، تجارتی تنظیموں اور چیمبرز کو بھی مدعو کیا تاکہ مؤثر نمائندگی کو یقینی بنایا جا سکے۔

علاوہ ازیں تیسرے دن کے دوران غیر ملکی مندوبین کے لیے صنعتی دورے بھی رکھے گئے تاکہ وہ پاکستان کی صنعتی صلاحیتوں کا مشاہدہ کر سکیں،نمائش میں مقامی انجینئرنگ یونیورسٹیوں کو بھی شامل کیا گیا ہے، جنہوں نے "اسٹارٹ اپ" کے عنوان سے اپنے تحقیقی منصوبے پیش کیے ۔

ٹی ڈی اے پی کے یہ اقدام نوجوانوں کی اختراعی صلاحیتوں کو اجاگر کرنے اور تعلیم و صنعت کے درمیان رابطے کو مضبوط بنانے کے لیے اٹھایا گیا ہے،ہیلتھ، انجینئرنگ اور منرلز شو 2025 سے نہ صرف پاکستان کی صنعتی قابلیت کو عالمی سطح پر متعارف کرا یا گیا بلکہ تجارتی شراکت داری، تحقیق و ترقی اور معاشی تعاون کے نئے دروازے بھی کھلے ہیں۔