عالمی منڈی میں تیل کی قیمتیں بڑھ گئیں
جاری کردہ اعداد و شمار کے مطابق برینٹ خام تیل کی قیمت میں 1.05 ڈالر، یعنی 1.04 فیصد اضافہ ہوا، جس کے بعد فی بیرل قیمت 101.63 ڈالر تک پہنچ گئی۔ اسی طرح امریکی ویسٹ ٹیکساس انٹرمیڈیٹ کی قیمت 80 سینٹ، یعنی 0.89 فیصد اضافے کے بعد 90.24 ڈالر فی بیرل ہوگئی۔
امریکی محکمہ موسمیات کے مطابق خلیجِ میکسیکو میں بننے والا سمندری طوفان آئندہ دو روز میں 2026 کا پہلا اٹلانٹک ہریکین بن سکتا ہے۔ ممکنہ ہریکین کے باعث خطے میں موجود امریکی آف شور تیل اور گیس تنصیبات متاثر ہونے کا خدشہ ہے۔
رپورٹ کے مطابق طوفان کی ممکنہ گزرگاہ میں موجود آف شور تنصیبات امریکا کی مجموعی خام تیل پیداوار کا تقریباً 15 فیصد جبکہ قدرتی گیس کی پیداوار کا 5 فیصد فراہم کرتی ہیں۔ تنصیبات کی سرگرمیاں متاثر ہونے کی صورت میں عالمی توانائی مارکیٹ میں سپلائی کے حوالے سے دباؤ بڑھ سکتا ہے۔
دوسری جانب مشرقِ وسطیٰ کی صورتحال بھی عالمی تیل منڈی کیلئے اہم بنی ہوئی ہے، سعودی عرب کی ایسٹ ویسٹ پائپ لائن سے تیل کی ترسیل 5.8 ملین بیرل یومیہ تک پہنچ گئی ہے۔
یہ بھی پڑھیں:سونے کی قیمت میں بڑا اضافہ، فی تولہ کتنے کا ہوگیا؟
وٹول کے سربراہ کے مطابق گزشتہ 7 سے 10 روز کے دوران مشرقِ وسطیٰ سے تقریباً 12 ملین بیرل یومیہ خام تیل اور 2 ملین بیرل یومیہ ریفائن شدہ مصنوعات ٹینکروں کے ذریعے برآمد کی گئی ہیں۔
