عالمی منڈی میں تیل کی قیمتیں گر گئیں
رپورٹس کے مطابق جمعے کو برینٹ خام تیل کی قیمت میں 79 سینٹ کمی ہوئی، جس کے بعد یہ تقریباً 104 ڈالر فی بیرل پر آگیا، جبکہ امریکی خام تیل ویسٹ ٹیکساس انٹرمیڈیٹ کی قیمت 70 سینٹ کمی کے بعد 101.20 ڈالر فی بیرل ریکارڈ کی گئی۔
واضح رہے کہ گزشتہ دنوں سعودی عرب کے ریڈ سی ایکسپورٹ مرکز ینبع سے خام تیل کی لوڈنگ متاثر ہونے اور ایسٹ ویسٹ آئل پائپ لائن کو نقصان پہنچنے کے باعث عالمی منڈی میں سپلائی کے حوالے سے خدشات بڑھے تھے، جس کے نتیجے میں تیل کی قیمتیں چار ماہ کی بلند سطح کے قریب پہنچ گئی تھیں۔
تاہم سعودی عرب کی جانب سے پائپ لائن کی تقریباً نصف صلاحیت بحال کرنے کی کوششوں اور ایشیائی ریفائنرز کو اضافی خام تیل فراہم کرنے کے اقدامات نے مارکیٹ کے خدشات کم کیے ہیں۔ سعودی عرب متبادل راستوں کے ذریعے عالمی منڈی تک تیل پہنچانے کی کوشش بھی کر رہا ہے۔
معاشی ماہرین کے مطابق تیل کی قیمتیں اب بھی 100 ڈالر فی بیرل سے اوپر ہیں، کیونکہ عالمی مارکیٹ حقیقی سپلائی میں مستقل بہتری کے شواہد کی منتظر ہے۔
دوسری جانب مشرق وسطیٰ کی کشیدہ صورتحال اور آبنائے ہرمز میں بحری نقل و حمل کو لاحق خطرات نے عالمی توانائی مارکیٹ میں غیر یقینی صورتحال برقرار رکھی ہوئی ہے۔
یہ بھی پڑھیں:پیٹرولیم مصنوعات کی نئی قیمتوں کا اعلان ، نوٹیفکیشن جاری
ایران کے پاسداران انقلاب سے متعلق ایک آئل ٹینکر کو نشانہ بنائے جانے کی اطلاع نے بھی سپلائی کے خدشات کو مکمل طور پر ختم نہیں ہونے دیا۔
