پیٹرولیم مصنوعات کی قیمتوں میں ایک بار پھر بڑا اضافہ
اوگرا کی جانب سے جاری کردہ نوٹیفکیشن کے مطابق پیٹرول کی فی لیٹر قیمت میں 6 روپے 39 پیسے اضافہ کیا گیا ہے، جس کے بعد پیٹرول کی نئی قیمت 327 روپے 12 پیسے فی لیٹر مقرر ہو گئی۔
نوٹیفکیشن کے مطابق ہائی اسپیڈ ڈیزل کی قیمت میں بھی اضافہ کیا گیا، ڈیزل کی فی لیٹر قیمت میں 7 روپے 83 پیسے اضافے کے بعد نئی قیمت 375 روپے 4 پیسے فی لیٹر ہو گئی ہے۔
واضح رہے کہ اس سے قبل ایک روز پہلے بھی یومیہ قیمتوں کے تعین کے نظام کے تحت پیٹرول اور ڈیزل کی قیمتوں میں اضافہ کیا گیا تھا۔ منگل کے روز پیٹرول کی قیمت میں 4 روپے 93 پیسے فی لیٹر جبکہ ہائی اسپیڈ ڈیزل کی قیمت میں 7 روپے 15 پیسے فی لیٹر اضافہ کیا گیا تھا۔
منگل کے اضافے کے بعد پیٹرول کی قیمت 320 روپے 73 پیسے فی لیٹر جبکہ ڈیزل کی قیمت 367 روپے 21 پیسے فی لیٹر مقرر کی گئی تھی، تاہم صرف 24 گھنٹوں کے دوران دوبارہ قیمتوں میں اضافے نے شہریوں پر مزید مالی دباؤ ڈال دیا ہے۔
یہ بھی پڑھیں:پاکستان اسٹاک مارکیٹ میں مندی
شہریوں کا کہنا ہے کہ پیٹرولیم مصنوعات کی قیمتوں میں اضافے کے اثرات براہ راست ٹرانسپورٹ، اشیائے خورونوش اور دیگر ضروری اشیا کی قیمتوں پر مرتب ہو سکتے ہیں۔
عوامی حلقوں نے مسلسل اضافے پر تشویش کا اظہار کرتے ہوئے حکومت سے ریلیف اقدامات کرنے کا مطالبہ کیا ہے۔
