کراچی سمیت ملک بھر کے صارفین کیلئے بجلی مہنگی،نوٹیفکیشن جاری
نیپرا کی جانب سے جاری نوٹیفکیشن کے مطابق بجلی کی قیمت میں 34 پیسے فی یونٹ اضافہ کیا گیا ہے، یہ اضافہ مئی 2026 کی ماہانہ فیول کاسٹ ایڈجسٹمنٹ کی مد میں کیا گیا جس کا اطلاق جولائی کے بجلی بلوں میں ہو گا۔
نوٹیفکیشن میں بتایا گیا ہے کہ بجلی کی قیمت میں اضافے کا اطلاق ملک بھر کے تمام صارفین پر کیا جائے گا، کراچی کے صارفین بھی اس اضافے سے مستثنیٰ نہیں ہوں گے اور کے الیکٹرک صارفین کو بھی جولائی کے بلوں میں اضافی رقم ادا کرنا پڑے گی۔
ذرائع کے مطابق سینٹرل پاور پرچیزنگ ایجنسی نے مئی کی فیول ایڈجسٹمنٹ کی مد میں بجلی 82 پیسے فی یونٹ مہنگی کرنے کی درخواست دی تھی تاہم نیپرا نے درخواست پر سماعت اور اعداد و شمار کا جائزہ لینے کے بعد 34 پیسے فی یونٹ اضافے کی منظوری دی۔
حکومت کی جانب سے نئے مالی سال کے پہلے ہی ماہ بجلی صارفین کے لیے یہ فیصلہ ایک نئی پریشانی بن گیا ہے، مہنگائی، گیس نرخوں، اشیائے ضروریہ اور دیگر اخراجات کے دباؤ میں گھرے صارفین کے لیے بجلی بل پہلے ہی بڑا مسئلہ بن چکے ہیں۔
یہ بھی پڑھیں: حکومت کا عوام کے لیے گیس کی قیمتوں میں کمی نہ کرنے کا فیصلہ
ماہرین کے مطابق فیول ایڈجسٹمنٹ کے تحت ہونے والے اضافے وقتی نوعیت کے ہوتے ہیں تاہم ان کا اثر براہ راست صارفین کے ماہانہ بلوں پر پڑتا ہے۔
شہریوں کا کہنا ہے کہ بجلی کی قیمتوں میں بار بار اضافے سے گھریلو بجٹ بری طرح متاثر ہو رہا ہے اور حکومت کو عوام کو حقیقی ریلیف دینے کے لیے توانائی شعبے میں مستقل اصلاحات کرنا ہوں گی۔
