کمشنر کراچی سہیل راجپوت نے سندھ ایسنشل کموڈیٹیز ایکٹ کے تحت نئی قیمتوں کا باقاعدہ نوٹیفکیشن جاری کرتے ہوئے ان پر فوری عملدرآمد کی ہدایت جاری کر دی۔
کمشنر کراچی کے مطابق تمام ہول سیلرز، ریٹیلرز اور ڈیپارٹمنٹل اسٹورز کو پابند کیا گیا ہے کہ وہ دکانوں پر نمایاں جگہ پر سرکاری قیمت نامہ آویزاں کریں تاکہ عوام کو مقررہ نرخوں سے آگاہی حاصل ہو سکے۔
انہوں نے واضح کیا کہ اگر کسی دکاندار نے سرکاری نرخوں کی خلاف ورزی کی تو اس کیخلاف سخت قانونی کارروائی عمل میں لائی جائے گی۔
کمشنر کراچی نے کہا کہ نئی سرکاری قیمتیں فوری طور پر نافذ العمل ہوں گی اور آئندہ احکامات تک برقرار رہیں گی، ہمارا مقصد عوام کو ریلیف فراہم کرنا اور ذخیرہ اندوزی و منافع خوری کا سدباب کرنا ہے۔
جاری کردہ قیمتوں کے مطابق دال ماش کی قیمت 335 روپے فی کلو، دال مونگ 340 روپے فی کلو، دال مسور 200 روپے فی کلو جبکہ دال چنا بھی 200 روپے فی کلو مقرر کی گئی ہے۔
یہ بھی پڑھیں:سونے اور چاندی کی قیمتوں میں اضافہ
اسی طرح کابلی چنا 295 روپے فی کلو اور کالا چنا 190 روپے فی کلو فروخت کیا جائے گا۔
مصالحہ جات کی نئی قیمتوں کے مطابق پسی ہوئی مرچ 750 روپے فی کلو جبکہ ثابت ہائبرڈ مرچ 560 روپے فی کلو مقرر کی گئی ہے۔
اس کے علاوہ ثابت دھنیا 430 روپے، پسا ہوا دھنیا 480 روپے، پسی ہلدی 590 روپے اور ثابت ہلدی 535 روپے فی کلو کی سرکاری قیمت مقرر کی گئی ہے۔
شہریوں کی جانب سے مطالبہ کیا گیا ہے کہ سرکاری نرخوں پر عملدرآمد یقینی بنانے کیلئے مارکیٹوں میں باقاعدہ چیکنگ کا نظام مؤثر بنایا جائے تاکہ مہنگائی سے متاثرہ عوام کو حقیقی ریلیف مل سکے۔
