جاری کردہ اعداد و شمار کے مطابق کاروباری ہفتے کے پہلے روز 100 انڈیکس میں 507 پوائنٹس کا اضافہ ہوا اور یہ ایک لاکھ 67 ہزار 592 پوائنٹس کی سطح پر پہنچ گیا، جس سے سرمایہ کاروں میں اعتماد میں اضافہ دیکھا گیا۔

گزشتہ کاروباری ہفتے کے آخری روز بھی مارکیٹ میں مثبت رجحان ریکارڈ کیا گیا تھا۔ اس دوران 28 ارب 45 کروڑ 57 ہزار 135 روپے مالیت کے 22 کروڑ 56 لاکھ 77 ہزار 720 شیئرز کا لین دین ہوا، جو مارکیٹ کی مضبوط طلب کی عکاسی کرتا ہے۔

معاشی ماہرین کا کہنا ہے کہ سرمایہ کاروں کے اعتماد میں اضافہ، ملکی معاشی حالات میں بہتری اور بڑی کمپنیوں کے بہتر مالیاتی نتائج مارکیٹ کی تیزی کی اہم وجوہات ہیں۔

دوسری جانب امریکی ڈالر بھی مسلسل کمی کا شکار ہے، ایکسچینج کمپنیز ایسوسی ایشن کے مطابق انٹر بینک مارکیٹ میں ڈالر میں 2 پیسے کی کمی کے بعد اس کی قیمت 280 روپے 40 پیسے ہو گئی۔

یہ بھی پڑھیں:سولر سسٹمز کی قیمتوں میں حیران کن کمی

واضح رہے کہ روپے کی مضبوطی کا یہ رجحان ملکی معیشت کیلئے مثبت ہے اور درآمدی اشیاء کی قیمتوں میں مستحکم اضافہ دیکھنے کو مل سکتا ہے۔

مالی تجزیہ کاروں کا کہنا ہے کہ مارکیٹ میں یہ تیزی سرمایہ کاری کیلئے اچھا موقع فراہم کر رہی ہے، تاہم سرمایہ کاروں کو محتاط رہنے اور مارکیٹ کی ممکنہ اتار چڑھاؤ پر نظر رکھنے کی ہدایت بھی کی گئی ہے۔