نجی ٹی وی کی رپورٹ کے مطابق راولپنڈی اور گرد نواح میں گزشتہ ہفتہ رفتہ کے دوران برائلر مرغی کی قیمتوں میں نمایاں کمی دیکھنے میں آئی تاہم ہفتے کے اختتام پر زندہ مرغی اور گوشت کے نرخوں میں ایک بار پھر اضافہ ہو گیا۔
رپورٹ میں بتایا گیا کہ اوپن مارکیٹ میں زندہ برائلر مرغی 365 سے 380 روپے فی کلو تک بیچی جارہی ہے جبکہ سرکاری ریٹ لسٹ میں زندہ برائلر کے 348 روپے فی کلو مقرر ہیں۔
اسی طرح اوپن مارکیٹ میں برائلر گوشت 550 روپے سے 600 روپے تک فی کلو میں فروخت ہو رہا جبکہ سرکاری ریٹ لسٹ میں برائلر مرغی کے گوشت کی قیمت 504 روپے فی کلو مقرر کی گئی ہے۔
مارکیٹ ذرائع کا بتانا ہے کہ مارکیٹ میں کسی بھی جگہ سرکاری ریٹ پر مرغی کا گوشت دستیاب نہیں جس کے باعث عوام کو شدید پریشانی کا سامنا کرنا پڑ رہا ہے۔
یہ بھی پڑھیں: ایک ہفتے کے دوران 18 اشیائے ضروریہ مہنگی، 12 سستی
شہریوں کا کہنا ہے کہ چند روز قبل مرغی اور گوشت کی قیمتوں میں معمولی کمی ہوئی تھی لیکن اب پھر نرخوں میں اضافہ ہو گیا ہے، گوشت کی قیمتوں میں اضافے سے مٹن اور بیف بعد برائلر مرغی بھی عوام کی پہنچ سے باہر ہو گئی ہے۔
شہریوں کی جانب سے پنجاب حکومت سے مطالبہ کیا گیا کہ برائلر غریب آدمی کے لیے کچھ سستی غذاء کا ذریعہ ہے اس کی قیمتوں میں توازن کو برقرار رکھا جائے تاکہ مٹن یا بیف کھانے کی سکت نہ رکھنے والے برائلر مرغی کے گوشت کے ذریعے اس کمی کو پورا کرسکیں۔
