جمعرات کے روز ہنڈرڈ انڈیکس میں 832 پوائنٹس کا نمایاں اضافہ دیکھا گیا جس کے بعد انڈیکس بلند ترین سطح پر پہنچ گیا۔

واضح رہے کہ مارکیٹ میں یہ تیزی سرمایہ کاروں کے اعتماد اور معاشی اشاریوں میں بہتری کی عکاسی کرتی ہے۔

جاری کردہ اعداد و شمار کے مطابق پاکستان اسٹاک مارکیٹ کا ہنڈرڈ انڈیکس 832 پوائنٹس بڑھ کر 166,472 پوائنٹس کی سطح پر ٹریڈ کر رہا ہے۔ اس سے قبل انڈیکس کی ریکارڈ ٹریڈنگ 166,509 پوائنٹس کی سطح پر دیکھی گئی تھی، جو کہ حالیہ برسوں میں ایک بڑی کامیابی تصور کی جا رہی ہے۔

معاشی ماہرین کے مطابق اس اضافے کی بنیادی وجوہات معاشی پالیسیوں میں استحکام، سرمایہ کاروں کے اعتماد میں اضافہ اور حکومتی سطح پر مثبت اقدامات ہیں۔

دوسری جانب کرنسی مارکیٹ میں بھی خوشخبری سامنے آئی ہے۔ انٹر بینک میں امریکی ڈالر کی قدر 6 پیسے کم ہوگئی، جس کے بعد ڈالر کی قیمت 281.31 روپے سے کم ہوکر 281.25 روپے پر آگئی۔

یہ بھی پڑھیں:سونے کی قیمت تاریخ کی نئی بلندیوں کو چھونے لگی

خیال رہے کہ ڈالر کے مقابلے میں روپے کی قدر میں یہ معمولی بہتری درآمدی اخراجات میں کمی اور زرمبادلہ کے ذخائر پر مثبت اثر ڈال سکتی ہے۔

اگر یہ رجحان برقرار رہا تو آنے والے دنوں میں سرمایہ کاری کے مزید مواقع پیدا ہوں گے اور روپے کی قدر میں بھی استحکام متوقع ہے۔ سرمایہ کاروں نے اس رجحان کو پاکستان کی معیشت کیلئے ایک مثبت اشارہ قرار دیا ہے۔