ایف بی آر کی جانب سے جاری وضاحتی بیان میں کہا گیا ہے کہ حال ہی میں کسی ایس آر او کے ذریعے انکم ٹیکس ریٹرن فارم 2025 میں کوئی تبدیلی یا ترمیم متعارف نہیں کرائی گئی ، سوشل میڈیا گروپس پر انکم ٹیکس ریٹرن2025 کے حوالے سے غلط معلومات پھیلائی جارہی ہیں۔

حکام کے مطابق اس سال انکم ٹیکس ریٹرن فارم 2025 سات جولائی کو ویب سائٹ پر جاری کردیا گیا تھا ، انکم ٹیکس ریٹرن فارم کے صفحہ 66 پر اثاثوں کی مارکیٹ ویلیو کا اندراج کرنا ضروری قرار دیا گیا تھا، کئی ٹیکس دہندگان اپنے اثاثوں کی مارکیٹ ویلیو کے خانے میں صفر درج کررہے تھے جسے روکا گیا ہے۔

ایف بی آر کی جانب سے کہا گیا کہ جائیداد کی مارکیٹ ویلیو کا اندراج مکمل طور پر ٹیکس دہندہ کی صوابدید پر ہے ،صاحب حیثیت لوگ پہلے ہی شق سیون ای کی رو سے اثاثوں کی معلومات درج کررہے ہیں، یہ معلومات ٹیکس کا حساب لگانے سے متعلق نہیں نہ ہی ان میں کسی غلطی پر ٹیکس کا کوئی نوٹس جاری ہو گا۔

یہ بھی پڑھیں: ایف بی آر کا ٹیکس نیٹ چھپانے والے جیولرز کے خلاف کارروائی کا عندیہ

فیڈرل بورڈ آف ریونیو کی جانب سے کہا گیا کہ امید ہے ٹیکس دہندگان اپنے اثا ثوں کی مالیت مارکیٹ ویلیو کے بہت قریب ڈیکلیئر کریں گے، جو ٹیکس دہندگان اپنے گوشوارے جمع کرا چکے ہیں ان سے اس میں ترمیم کرنے یا ری فائل کرنے کا نہیں کہا جائے گا۔

ایف بی آر کے مطابق اثاثوں کی مارکیٹ ویلیو ٹیکس کےحساب کے لئے استعمال نہیں ہو گی ، ویلتھ سٹیٹ منٹ کی ری کونسیلیشن کے لئے بھی انہیں زیر غور نہیں لایا جائے گا، انکم ٹیکس ریٹرن فائل کرنے کے لئے IRISسسٹم مکمل طور پر درست کام کررہا ہے۔

فیڈرل بورڈ آف ریونیو کی جانب سے ہدایت کی گئی ہے کہ ٹیکس دہندگان اپنے انکم ٹیکس گوشوارے جلد از جلد جمع کرائیں ، انکم ٹیکس گوشوارہ جمع کرانے کی آخری تاریخ 30 ستمبر 2025 ہے۔