وزارت غذائی تحفظ کے مطابق شوگر ملوں کے ساتھ چینی کی ایکس مل قیمت 165 روپے فی کلو گرام مقرر کی گئی ہے، تمام صوبائی حکومتیں اس فیصلے کی روشنی میں عوام کو سستی چینی کی دستیابی یقینی بنائیں گی۔

یاد رہے کہ اس سے قبل ملک کے مختلف شہروں میں فی کلو چینی کی قیمت 200 روپے تک پہنچ گئی تھی۔

گزشتہ دنوں جاری کی گئی ادارہ شماریات کی ہفتہ وار رپورٹ کے مطابق کراچی،اسلام آباد اور راولپنڈی میں چینی کی قیمت 200 روپے فی کلو تک پہنچ گئی جبکہ لاڑکانہ میں چینی 195، سیالکوٹ اور لاہور میں چینی 192 روپے فی کلو تک بیچی جارہی ہے۔

یہ بھی پڑھیں: ملک میں چینی کی فی کلو قیمت کی ڈبل سنچری مکمل

اسی طرح گوجرانوالہ، ملتان ،حیدرآباد اور پشاور میں چینی 190 روپے فی کلو تک فروخت ہورہی ہے ،کوئٹہ اورخضدار میں چینی کی قیمت 188 روپے فی کلو تک میں دستیاب ہے، فیصل آباد ،سرگودھا ،بہاولپور اور بنوں میں چینی کی قیمت 185 روپے فی کلو تک ہے ۔

رپورٹ کے مطابق سکھر میں فی کلو چینی 180 روپے تک بیچی جا رہی ہے، ایک ہفتےمیں چینی کی اوسط قیمت میں3 روپے 52 پیسے فی کلو کا اضافہ ہوا جبکہ ملک میں چینی کی اوسط قیمت 188 روپے 44 پیسے فی کلو ہے۔

حکام کے مطابق جولائی تا مئی کے دوران ملک سے 7 لاکھ 65 ہزار میٹرک ٹن چینی برآمد کی گئی جس سے 112 ارب روپے سے زائد آمدن حاصل ہوئی تاہم برآمدات نے مقامی مارکیٹ میں چینی کی دستیابی کو متاثر کیا جس کے باعث اس کی قیمتوں میں بے قابو اضافہ ہوا۔