صرافہ ایسوسی ایشن کے مطابق پاکستان میں فی تولہ سونا 2380 روپے مہنگا ہو کر 3 لاکھ 23 ہزار 380 روپے کا ہو گیا ہے، جبکہ دس گرام سونے کی قیمت میں 2041 روپے کا اضافہ ہوا ہے، جس کی قیمت اب 2 لاکھ 77 ہزار 246 روپے تک پہنچ چکی ہے۔

واضح رہے کہ اس اضافے کے ساتھ سونے کی قیمتیں ایک بار پھر بلند ترین سطح پر جا پہنچی ہیں۔ رپورٹ کے مطابق انٹرنیشنل مارکیٹ میں فی اونس سونا 27 ڈالر مہنگا ہو کر 3096 ڈالر فی اونس تک پہنچ چکا ہے۔

یاد رہے کہ گزشتہ روز بھی سونے کی قیمتوں میں ریکارڈ اضافہ ہوا تھا، جس کے نتیجے میں فی تولہ سونا 3200 روپے اور فی اونس سونا 31 ڈالر مہنگا ہوا تھا۔

معاشی ماہرین کے مطابق سونے کی قیمتوں میں یہ مسلسل اضافہ عالمی مارکیٹ میں معاشی عدم استحکام، افراط زر اور سرمایہ کاری کے بڑھتے ہوئے رجحانات کی وجہ سے ہو رہا ہے، جس سے سونا ایک محفوظ سرمایہ کاری کا ذریعہ بن رہا ہے۔

دوسری جانب قیمتوں میں اضافے کا اثر مقامی بازاروں میں بھی واضح طور پر دیکھا جا رہا ہے۔