پاکستان اسٹاک ایکسچینج میں دن کے آغاز پر ہی تیزی دیکھی گئی ہے اور مارکیٹ تاریخ میں پہلی بار ایک لاکھ پوائنٹس عبور کر گئی ہے۔ گزشتہ روز بھی اسٹاک مارکیٹ میں تاریخی تیزی دیکھی گئی تھی اور کسی بھی ایک دن میں پہلی بار 4 ہزار 847 پوائنٹس یعنی پانچ فی صد سے زائد کا اضافہ ہوا تھا۔

وزیرِ اعظم شہباز شریف نے پاکستان اسٹاک ایکسچینج کے 100 انڈیکس کے 1 لاکھ پوائنٹس سے تجاوز پر پوری قوم کو مبارکباد دیتے ہوئے کہا کہ اسٹاک ایکسچینج کا تاریخ میں پہلی مرتبہ ایک لاکھ پوائنٹس سے تجاوز کرنا حکومتی پالیسیوں پر کاروباری برادری اور سرمایہ کاروں کے بھروسے کی عکاسی کرتا ہے۔

شہباز شریف کا کہنا تھا کہ اس سنگ میل کو عبور کرنے کیلئے حکومتی معاشی ٹیم اور ملک میں سرمایہ کاری کے فروغ کیلئے مصروف عمل حکام لائق تحسین ہیں، اپنی قوم سے عہد کیا تھا کہ ملکی معاشی استحکام اور ملکی ترقی کیلئے ہر ممکن اقدام اٹھاؤں گا۔

 انہوں نے کہا کہ پاکستان کو ڈیفالٹ سے بچانے کیلئے اپنی سیاست کی قربانی دی، اللہ کے فضل و کرم سے قربانی رائیگاں نہیں گئی، انتشاری ٹولے کے جاتے ہی مثبت رجحان لوٹ آیا،  ملکی استحکام و ترقی کے دشمن ملک کو دوبارہ ڈی ریل کرنے کی مزموم و ناکام کوششیں کر رہے ہیں۔

ان کا کہنا تھا کہ ملک میں مہنگائی کی شرح میں مزید کمی ہوئی ہے، شرح سود 15 فیصد اور ترسیلاتِ زر ریکارڈ سطح پر پہنچ چکے، ملکی ترقی کیلئے یونہی محنت کرتے رہیں گے، ملکی ترقی و خوشحالی کے دشمنوں کو اپنے مزموم مقاصد میں کامیاب نہیں ہونے دینگے۔