پاکستانی روپیہ ایشیا کی بہترین کرنسی: ایک سال میں 3.1 فیصد بہتری
May, 31 2024
لاہور:(ویب ڈیسک) گذشتہ ایک سال کے دوران پاکستانی روپیہ امریکی ڈالر کے مقابلے میں ایشیاء کی بہترین کرنسی بن گیا ہے۔ روشن ڈیجیٹل اکاؤنٹ کے ذریعے 8 ارب ڈالر کی غیر ملکی کرنسی کی آمد نے اس بہتری میں اہم کردار ادا کیا۔
ٹاپ لائن ریسرچ کے اعداد و شمار کے مطابق، ایم ایس سی آئی ایشیا ءایمرجنگ اینڈ فرنٹیئر مارکیٹ انڈیکس میں پاکستانی کرنسی 3.1 فیصد بہتری کے ساتھ 278.12 روپے فی ڈالر کی سطح پر پہنچ گئی ہے۔
روپے کی قدر میں اضافے کی بڑی وجوہات میں آر ڈی اے انفلوز، ترسیلات زر، مستحکم ایکسپورٹس، اور آئی ایم ایف، ورلڈ بینک اور دیگر ممالک سے قرضوں کا حصول شامل ہیں۔
ایشیا ءمیں سری لنکن کرنسی 2.7 فیصد کی بہتری کے ساتھ دوسرے نمبر پر رہی، جبکہ بھارت، چین، ویتنام اور بنگلہ دیش کی کرنسیوں میں 5.6 فیصد تک گراوٹ دیکھی گئی ہے۔
ستمبر 2020 ء میں روشن ڈیجیٹل اکاؤنٹ کے آغاز سے اب تک 45 ماہ میں اوورسیز پاکستانیوں نے اس کے ذریعے 8 ارب ڈالر سے زائد رقم بھیجی ہے۔ عیدالاضحیٰ کے قریب آنے کی وجہ سے آر ڈی اے کی آمد میں مزید تیزی دیکھی جارہی ہے، کیونکہ اوورسیز پاکستانی اپنی فیملیوں کو سپورٹ کرنے کے لیے رقوم بھیج رہے ہیں۔
