لاہور:(سنو نیوز) قومی ٹیسٹ سکواڈ کے کیمپ کو لاہور میں کرکٹرز فہیم اشرف اور امام الحق نے دورہ آسٹریلیا کیلئے جوائن کرلیا۔ شادی تقریبات میں مصروف دونوں کرکٹرز پنڈی کیمپ میں شرکت نہ کرسکے تھے، نیشنل کرکٹ اکیڈمی لاہور میں کھلاڑیوں نے وارم اپ اور فیلڈنگ پریکٹس کی۔. خیال رہے کہ دورہ آسٹریلیا کی تیاریوں کیلئے پاکستانی کرکٹ سکواڈ کا تربیتی کیمپ جاری ہے، کھلاڑیوں نے سیشن کے دوران بیٹنگ، بائولنگ اور فیلڈنگ کی بھرپور مشقیں کیں ہیں۔ پاکستانی فاسٹ بولر محمد وسیم جونیئر نے بھی پاکستان ٹیسٹ سکواڈ کا تربیتی کیمپ جوائن کر لیا تھا، اس موقع پر کھلاڑیوں نے آپس میں سینیریو میچ بھی کھیلا تھا، سینیریو میچ کا آغاز عبداللّٰہ شفیق اور صائم ایوب نے کیا جبکہ شاہین آفریدی اور خرم شہزاد نے اوپننگ سپیل کرایا۔ پاکستانی کرکٹ ٹیم کا سکواڈ آج 28 نومبر کو اسلام آباد سے لاہور آ چکا ہے جسکے بعد قومی ٹیم 30 نومبر کو لاہور سے آسٹریلیا کیلئے روانہ ہو جائے گی۔ خیال رہے کہ کچھ دن قبل لاہور میں پریس کانفرنس کرتے ہوئے چیف سلیکٹر وہاب ریاض نے 18 رکنی ٹیسٹ سکواڈ کا اعلان کیا تھا، سکواڈ میں کپتان شان مسعود، بابراعظم، عبداللہ شفیق، امام الحق، حسن علی، فہیم اشرف، ابرار احمد، شاہین آفریدی، عامر جمال، خرم شہزاد، سعود شکیل، سرفراز احمد، میر حمزہ ، محمد رضوان ، وسیم جونیئر ، نعمان علی، صائم ایوب اور سلمان علی آغا شامل ہیں۔ یہ بھی پڑھیں https://sunonews.tv/27/11/2023/sports/56493/ وہاب ریاض کا پریس کانفرنس کرتے ہوئے کہنا تھا کہ‌ فاسٹ بولر حارث رؤف نے خود کو ٹیسٹ کھیلنے سے دستبردار کیا ہے، ہم نے حارث رؤف کو ہر ممکن سہولیات دینے کی کوشش کی اور دورے کے لیے حارث رؤف سے بات ہوئی تھی، فزیو نے بتایا کہ آگے جا کر فٹنس کا ایسا کوئی ایشو نہیں ہے لیکن حارث نے خود دورے پر جانے سے انکار کیا۔ چیف سلیکٹر نے نسیم شاہ کے حوالے سے بتایا کہ نسیم شاہ اگلے تین ہفتوں میں بولنگ شروع کرے گا جبکہ محمد حسنین نے ورزش شروع کی ہے ایک سے دو ہفتوں میں وہ پریکٹس کا آغاز کریں گے۔ انہوں نے کہا کہ فاسٹ بائولر شاہنواز دہانی، شاداب خان، اسامہ میر، عثمان قادر اور محمد نواز کیمپ کوجوائن کریں گے۔ وہاب ریاض کا کہنا تھا کہ ٹاپ آرڈر میں امام الحق ،عبداللہ شفیق اور شان مسعود پرفارم کررہے ہیں، چار پانچ اسپینر کیمپ میں بلائے گئے ہیں ، صاحبزادہ فرحان ٹاپ سکورر رہے لیکن ابھی سکواڈ میں جگہ نہیں۔