روم: (سنو نیوز) اٹلی میں خواتین پر تشدد کے خلاف دسیوں ہزار افراد نے احتجاج کیا۔ یہ احتجاج اس ماہ ایک طالب علم کی ہلاکت کے بعد شروع ہوا تھا۔

یہ دعویٰ کیا جا رہا ہے کہ جولیا چکٹن نامی اس خاتون کو اس کے سابق بوائے فرینڈ نے گریجویشن کے چند روز بعد ہی قتل کر دیا تھا۔ رپورٹس میں بتایا گیا ہے کہ میلان اور نیپلز کے شہروں میں لوگ احتجاج پر اتر آئے ہیں اور روم میں لوگوں کی بڑی تعداد کے جمع ہونے کی وجہ سے سڑکیں بند کر دی گئی ہیں۔

اطالوی صدر نے اس قتل کو ناقابل برداشت قرار دیا ہے۔ سرجیو ماتارلا نے خواتین کے خلاف تشدد کی روک تھام کے عالمی دن کے موقع پر ایک پریس ریلیز میں کہا: ’’اس طرح کی افسوسناک خبریں ملک کے ضمیر کو جھنجھوڑ دیتی ہیں‘‘۔

انہوں نے کہا: "ایک مہذب معاشرہ خواتین پر اس قسم کے حملے اور قتل کو برداشت نہیں کر سکتا۔" خواتین کے خلاف تشدد کا ذمہ دار معاشرہ ہے۔ اطالوی وزارت داخلہ کے اعداد و شمار کے مطابق رواں سال اب تک 106 خواتین کو قتل کیا جا چکا ہے جن میں سے 55 خواتین کے بارے میں کہا جاتا ہے کہ وہ اپنے ساتھیوں یا سابق ساتھیوں کے ہاتھوں قتل ہوئیں۔

اٹلی میں میڈیکل انجینئرنگ (بائیو میڈیکل انجینئرنگ) کے 22 سالہ طالب علم کو قتل کرنے پر عام لوگوں کا غصہ سامنے آیا۔اس کے والد جیو چکٹن نے اپنی بیٹی کی موت کے بارے میں کہا کہ کوئی چیز جولیا کو ہمارے پاس واپس نہیں لا سکتی، لیکن میں چاہتا ہوں کہ اس کی موت اچھی تبدیلیوں کا سبب اور ذریعہ بنے۔

پولیس حکام کے مطابق جولیا چکٹن 11 نومبر کو اس وقت لاپتہ ہوگئیں جب وہ گریجویشن کا لباس خریدنے بازار گئی تھیں۔ کچھ دنوں بعد اس کی لاش ملی تھی۔ سیکیورٹی کیمروں سے حاصل کی گئی ویڈیو میں دیکھا جا سکتا ہے کہ ان کا سابق بوائے فرینڈ فلیپو ٹورٹا ان کو مار رہا ہے۔ تفتیش اور نگرانی کے بعد ٹورٹا کو جرمنی کے شہر لیپزگ کے قریب سے گرفتار کیا گیا۔

انہیں گذشتہ ہفتے کی سہ پہر اٹلی لایا گیا تھا، لیکن ابھی تک ان پر سرکاری طور پر فرد جرم عائد نہیں کی گئی ہے۔ اطلاعات کے مطابق وہ اس وقت ویرونا کی ایک جیل میں قید ہیں اور اگلے منگل کو ان کی پہلی عدالت میں پیشی ہوگی۔

اطالوی وزیر اعظم جارجیا میلونی نے شوہروں اور شراکت داروں کی طرف سے خواتین کے خلاف تشدد کی طویل تاریخ پر "گہرے غصے" کا اظہار کرتے ہوئے اس کو روکنے کے لیے اسکولوں میں ایک بڑی مہم شروع کرنے اور اس "ناگوار روایت" کو ختم کرنے کی کوشش کرنے کا وعدہ کیا ہے۔