کراچی:(سنو نیوز) سونے کی قیمت میں بڑا اضافہ ہوا ہے، ملک میں سونے کی فی تولہ قیمت میں 800 روپے کا اضافہ ہو گیا۔ آل پاکستان جیمز اینڈ جیولرز ایسوسی ایشن کے مطابق ملک میں سونے کی فی تولہ قیمت 2 لاکھ 16 ہزار 500 روپے ہو گئی ہے، ایسوسی ایشن کے مطابق عالمی صرافہ بازار میں سونے کی قیمت 9 ڈالر اضافے سے 2002 ڈالر فی اونس ہے۔ خیال رہے کہ گذشتہ روز ملک میں سونے کی قیمت میں 150 روپے کی معمولی کمی ہوئی تھی۔ عالمی منڈی میں سونے کے نرخ بڑھنے پر مقامی سطح پر سونے کی قیمت میں اضافہ ہوگیا تھا۔ کچھ دن قبل گولڈ مارکیٹ میں سونے کی قیمت میں بائیس سو روپے کا اضافہ ہوا تھا جس کے بعد ایک تولہ سونے کی قیمت دو لاکھ سولہ ہزار آٹھ سو روپے پر آ گئی تھی۔ مارکیٹ رپورٹس کے مطابق بین الاقوامی بلین مارکیٹ میں فی اونس سونے کی قیمت 20 ڈالر کے اضافے سے 2006 ڈالر کی سطح پر پہنچنے پر مقامی صرافہ مارکیٹوں میں جمعہ کو 24 قیراط کے حامل فی تولہ سونے کی قیمت 2200 روپے بڑھ کر دو لاکھ 16 ہزار800 روپے ہوگئی تھی۔ یہ بھی پڑھیں https://sunonews.tv/25/11/2023/latest/56139/ دوسری جانب نٹر بینک میں ڈالر سستا ہو گیا، انٹر بینک میں ڈالر کی قدر میں 38 پیسے کی کمی آئی ہے، انٹر بینک میں ڈالر 284 روپے 75 پیسے پر ٹریڈ ہو رہا ہے، گذشتہ روز ڈالر 285 روپے 13 پیسے پر بند ہوا تھا۔ پاکستان سٹاک مارکیٹ میں کاروبار کے آغاز پر تیزی کا رجحان دیکھا گیا ہے، 100 انڈیکس 222 پوائنٹس اضافے سے 58421 کی سطح پر ٹریڈ کر رہا ہے۔ پاکستان سٹاک ایکسچینج میں گذشتہ ایک ہفتے سے تیزی دیکھی جارہی ہے، 16 نومبر کو ہنڈرڈ انڈیکس پہلی بار 57 ہزار کی سطح عبور کرگیا جبکہ 21 نومبر کو بھی مارکیٹ میں تیزی دیکھی گئی اور کاروبار کے اختتام پر ہنڈرڈ انڈیکس 222 پوائنٹس اضافے سے 58421 پر بند ہوا۔ دوسری جانب کاروباری ہفتے کے آخری روز بھی سٹاک مارکیٹ نے نئی بلندیوں کی طرف اپنی پرواز جاری رکھی تھی، معیشت کی ساکھ بحال ہونے اور سرمایہ کاروں کے اعتماد میں اضافے کے بعد سٹاک مارکیٹ مسلسل تیزی سے اوپر جا رہی ہے، ہنڈرڈ انڈیکس نے آج انسٹھ ہزار کی ایک اور حد بھی عبور کر لی۔