کراچی:(سنو نیو) رواں ہفتہ سٹاک مارکیٹ کا ایک اور تاریخ ساز کاروباری ہفتہ رہا، ہنڈرڈ انڈیکس 2000 پوائنٹس اضافے کے بعد59000 کی حد بھی عبور کر گیا۔ انٹربینک اور اوپن مارکیٹ میں ڈالر سستا اور گولڈ مارکیٹ میں سونا مہنگا ہوا۔ سٹاک مارکیٹ نئے پر نئے ریکارڈ بنا رہی ہے، معاشی ساکھ کی بحالی اور پاکستان کے کنٹری رسک پریمیم میں غیر معمولی کمی نے غیر ملکی سرمایہ کاروں کا اعتماد بحال کرنے میں مدد دی،اس ہفتے بھی سٹاک مارکیٹ نے نئی بلندیوں کی طرف سفر جاری رکھا۔ پانچ روز کے کاروباری سیشنز میں ہنڈرڈ انڈیکس میں 2000 سے زائد پوائنٹس کا غیر معمولی اضافہ ہوا، انڈیکس نے 58اور 59ہزار کی دو نفسیاتی حدوں کو ایک ہی ہفتے میں عبور کر لیا، کاروباری ہفتے کے اختتام پر انڈیکس 59 ہزار 86 پوانئنٹس پر بند ہوا۔ ٹریڈرز نے رواں ہفتے 105 ارب روپے کی سرمایہ کاری پر 90 کروڑ ڈالر یعنی 268 ارب روپے کا بڑا منافع کمایا، کاروباری حجم 3 ارب 65 کروڑ حصص سے تجاوز کر گیا، مارکیٹ کیپٹلائزیشن 8 ہزار 550 ارب روپے پر پہنچ گئی۔ یہ بھی پڑھیں: پیٹرولیم مصنوعات کی قیمتیں 7 روز بعد تبدیل کرنے کا پلان ادھر کرنسی مارکیٹ میںروپیہ دباؤ کا شکار ہے تاہم اس ہفتے انٹربینک میں ڈالر ایک روپیہ 13 پیسے سستا ہو کر 285 روپے 37 پیسے پر بند ہوا، اوپن مارکیٹ میں ڈالر کی قیمت پونے دو روپے کمی کے بعد 286 روپے 50 پیسے پر آ گئی۔ دوسری طرف گولڈ مارکیٹ میں ایک تولہ سونا 1400 روپے مہنگا ہو کر 2 لاکھ 16 ہزار 500 روپے میں فروخت ہوا۔ گذشتہ روز کرنسی مارکیٹ میں روپیہ دوسرے روز بھی سستا ہوا تھا، انٹربینک میں ایک ڈالر کی قیمت دس پیسے اضافے کے بعد 285 روپے 37 پیسے پر بند ہوا۔ اوپن مارکیٹ میں ڈالر کی قیمت 50 پیسے اضافے کے بعد 286 روپے پچاس پیسے رہی، گذشتہ دنوں کرنسی مارکیٹ میں روپے نے ڈالر کو مشکل میں ڈالے رکھا، انٹربینک میں ڈالر 18 پیسے سستا ہو کر 285 روپے 79 پیسے پر بند ہوا۔ دوسری جانب کاروباری ہفتے کے آخری روز بھی سٹاک مارکیٹ نے نئی بلندیوں کی طرف اپنی پرواز جاری رکھی تھی، معیشت کی ساکھ بحال ہونے اور سرمایہ کاروں کے اعتماد میں اضافے کے بعد سٹاک مارکیٹ مسلسل تیزی سے اوپر جا رہی ہے، ہنڈرڈ انڈیکس نے آج انسٹھ ہزار کی ایک اور حد بھی عبور کر لی۔