پشاور: (سنو نیوز) پاکستان میں بدھ کی شام رمضان المبارک کا چاند نظر آ گیا ہے۔ بروز جمعرات کو ماہ صیام کا آغاز ہوگا۔ سنو نیوز کی جانب سے تمام اہلِ اسلام کو ماہ مقدس کی بابرکت ساعتیں مبارک ہوں۔ 

رمضان المبارک 1444 ھ کا چاند دیکھنے کیلئے مرکزی رویت ہلال کمیٹی کا اجلاس چیئرمین عبدالخبیر آزاد کے زیر صدارت پشاور میں ہوا۔ جبکہ زونل کمیٹیوں کے اجلاس مختلف شہروں میں منعقد کئے گئے۔ لاہور، کوئٹہ اور صوبہ سندھ کے شہروں میں رمضان المبارک کا چاند نظر نہ آنے کی شہادتیں موصول ہوئیں۔

اجلاس کے بعد پریس کانفرنس کرتے ہوئے چیئرمین مرکزی رویت ہلال کمیٹی کا کہنا تھا کہ پاکستان میں متعدد جگہ سے چاند نظر آنے کی شہادتیں موصول ہوئی ہیں۔

خیال رہے کہ اسلامی ممالک میں جغرافیائی محل وقوع کی بنا پر نئے چاند کی رویت میں ایک آدھ دن کا فرق ہوتا ہے۔ قمری کیلنڈر 12 ماہ اور 354 یا 355 دنوں پر مشتمل ہوتا ہے۔ مسلمان چاند دیکھ کر اپنے قمری مہینے کا آغاز کرتے ہیں۔

یہ مبارک مہینہ مسلمانوں کے لئے نیکیوں کا موسم بہار کہلاتا ہے۔ اسے روزے اور روحانیت کا مہینہ سمجھا جاتا ہے۔ رمضان المبارک دنیا بھر میں ایک ارب 80 کروڑ سے زیادہ مسلمان مناتے ہیں۔

مسلمان اس ماہ مقدس میں عبادات کا خوب اہتمام کرتے ہیں۔ وہ دن میں روزہ رکھتے اور راتوں کو نمازتراویح کا اہتمام کرتے ہیں۔ مستحقین کو صدقہ، زکوٰۃ وخیرات کرتے اور اختتام رمضان پر غربا اور پسماندہ طبقات کو عید کی خوشیوں میں شریک کرنے کے لئے صدقہ فطر دیتے ہیں۔

اس مقدس مہینے میں روزہ دارعلی الصباح سے غروب آفتاب تک کھانے، پینے کے علاوہ بعض جائز امور سے بھی گریزکرتے ہیں اور روایتی طور پر شام کو روزہ افطار کرنے کے لئے اہلخانہ اور دوستوں کے ساتھ جمع ہوتے ہیں۔اس مقدس مہینے میں روزہ کشائی کے لئے مساجد اورعام عوامی مقامات پر بھی اجتماعی افطار کا اہتمام کیا جاتا ہے۔

ماہِ صیام میں اللہ تعالیٰ نے اپنی آخری کتاب قرآن مجید پیغمبرآخر الزمان حضرت محمدﷺ پر نازل کی۔ رمضان المبارک کا روزہ اسلام کے 5 ستونوں میں تیسرے نمبر پر ہے اور تمام صحت مند مسلمانوں پر اس کا اہتمام کرنا لازمی ہے۔ تاہم دودھ پلانے یا حیض والی خواتین، حاملہ خواتین، بیمار افراد اور مسافروں  کو اس سے استثنیٰ حاصل ہے۔