کراچی :(ویب ڈیسک) سابق رکن اسمبلی فردوس عاشق اعوان کا کہنا ہے کہ قومی کرکٹ اسٹار شعیب ملک نے ثانیہ مرزا کیساتھ اپنی شادی قائم رکھنے کے لیے ایڈجسٹمنٹ کی بہت زیادہ کوشش کی ہے۔

تفصیلات کے مطابق نجی ٹی وی شو میں کرکٹر شعیب ملک کے حوالے سے گفتگو کرتے ہوئے ترجمان استحکام پاکستان پارٹی کا کہنا تھا کہ شعیب ملک ایک اسٹریٹ بوائے ہوتے تھے، جب انہوں نے کرکٹ کیرئیر کا آغاز کیا تب ان کے پاس اسپورٹس کٹ تک نہیں تھی، شعیب ملک کو ان کے ایک رشتہ دار نے کرکٹ اسٹار بنایا، وہ ان کے کلب کا حصہ بنے اور پھر دنیائے کرکٹ پر چھا گئے۔

فردوس عاشق اعوان نے انٹرویو میں شعیب ملک کی شادی کے حوالے سے بتایا کہ جب وہ شادی کر رہے تھے تب انہوں نے ایک رشتہ دار اور فردوس عاشق اعوان کو بارات کے ساتھ بھارت چلنے کا کہا۔

فردوس عاشق نے مزید کہا کہ جب وہ بھارتی شہر حیدرآباد پہنچے اور انہوں نے ثانیہ مرزا کے رشتے داروں کو دیکھا تو انہوں نے شعیب ملک کو خبردار کرتے ہوئے کان میں کہا کہ بیٹا تم بری طرح پھنس چکے ہو۔

سابق رکن قومی اسمبلی کا کہنا تھا وہاں کے حالات اور معاملات دیکھ کر ہی وہ سمجھ گئی تھیں کہ دونوں طرف محبت کا بھوت سوارہے، جب تک دونوں کے درمیان محبت قائم رہے گی تب تک معاملہ آگے بڑھے گا۔

فردوس عاشق اعوان کے مطابق شعیب ملک نے شادی کو چلانے کے لیے بڑی کوشش کی ،اس مقصد کے لیے انہوں نے بھارت یا پاکستان میں رہنے کے بجائے تیسرے ملک کا انتخاب کیا،تاہم انہوں نے واضح نہیں کیا کہ شعیب ملک اور ثانیہ مرزا کے درمیان اختلافات ہیں یا نہیں۔

واضح رہے کہ شعیب ملک اور ثانیہ مرزا کے درمیان دسمبر 2022 سے علیحدگی اور طلاق کی خبریں ہیں اور دونوں وقتاً فوقتاً مذکورہ معاملے پر مبہم انداز میں بات کر چکے ہیں لیکن انہوں نے واضح طور پر خبروں کی تردید یا تصدیق نہیں کی۔

طویل عرصے سے ثانیہ مرزا بھارت جب کہ شعیب ملک پاکستان میں مقیم ہیں اور ان کا بیٹا والدہ کے ہمراہ ہے۔رواں ماہ ایک بار پھر دونوں کے درمیان طلاق کی خبریں اس وقت گردش کرنے لگیں جب شعیب ملک نے اپنے انسٹاگرام کے بائیو سے ثانیہ مرزا کا نام نکالا۔