بارسلونا :(سنو نیوز) کولمبیا کی مشہور پاپ گلوکارہ شکیرا نے ٹیکس فراڈ کے ایک مقدمے میں عدالت میں پیش ہونے سے کچھ دیر قبل ہسپانوی پراسیکیوٹرز کے ساتھ سمجھوتہ کرلیا۔ اس معاملے میں وہ ساڑھے 7 ملین یورو جرمانہ ادا کرنے پر راضی ہوگئی ہیں۔

اگر یہ تصفیہ نہ ہوتاتو استغاثہ نے شکیرا کو تقریباً 24 ملین یورو جرمانہ اور 8 سال قید کی سزا دینے کاکہا تھا۔پاپ گلوکارہ شکیرا کو بارسلونا کی ایک عدالت میں ساڑھے 14 ملین یورو کے ٹیکس فراڈ کے الزامات کا سامنا تھا۔

وہ بارہا ان الزامات کی تردید کرتی رہی ہیں لیکن اب انہوں کا کہنا ہے کہ اس نے اپنے بچوں کی خاطر اس معاہدے پر رضامندی ظاہر کی ہے۔معروف گلوکارہ شکیرا نے ایک نسبتاً طویل بیان میں کہا کہ ان کے بچے نہیں چاہتے تھے کہ "ان کی والدہ اس جدوجہد کے لیے اپنی ذاتی بھلائی کی قربانی دیں۔"

شکیرا نے اس سے قبل استغاثہ کی جانب سے پیش کردہ درخواست کی ڈیل کو مسترد کر دیا تھا اور اس کی بجائے عدالت میں پیش ہونے کا فیصلہ کیا تھا۔ انہوں نے کہا کہ "اپنی پوری پیشہ ورانہ زندگی میں، میں نے ہمیشہ صحیح کام کرنے اور دوسروں کے لیے ایک مثبت مثال بننے کی کوشش کی ہے۔"

انہوں نے ایک بیان میں مزید کہا، "بدقسمتی سے، اور ان کوششوں کے باوجود، اسپین میں ٹیکس حکام نے میرے خلاف کئی دوسرے پیشہ ور کھلاڑیوں اور دیگر معروف لوگوں کی طرح، برسوں سے ایک کیس کھول دیا ہے۔" اس سے لوگوں کی توانائی، وقت اور ضائع ہوتا ہے۔

شکیرا نے کہا کہ مجھے یقین تھا کہ میں عدالت میں اپنی بے گناہی کا دفاع کروں گی اور میرے وکلاء کو یقین تھا کہ فیصلہ میرے حق میں آئے گا۔ لیکن وہ کہتی ہیں کہ آخر کار وہ اپنے بچوں کی خاطر اس معاہدے پر راضی ہو گئیں، جو نہیں چاہتے تھے کہ اس کی ماں اس جدوجہد میں اپنا سکون قربان کرے۔

ٹیکس فراڈ کیس کیا تھا؟

استغاثہ نے دعویٰ کیا تھا کہ وہ شکیرا ان سالوں کے درمیان اسپین میں مقیم تھیں، لیکن رہائش کی ایک مختلف جگہ کا اندراج کیا۔ ہسپانوی قانون کے مطابق اگر کوئی شخص چھ ماہ سے زائد عرصے سے غیر حاضر رہے تو اس پر ٹیکس عائد کیا جا سکتا ہے۔ لیکن شکیرا کا کہنا ہے کہ اس عرصے میں ان کی زیادہ تر رہائشا سپین سے باہر تھی۔

استغاثہ نے جولائی میں ایک دستاویز جاری کی، جس میں الزام لگایا گیا ہے کہ شکیرانے 2012 ء میں بارسلونا میں ایک گھر خریدا تھا اور وہ وہاں اپنے سابق بوائے فرینڈ جیرارڈ پیک کے ساتھ رہتی تھی، جو بارسلونا کے ایک مشہور فٹ بال کھلاڑی ہیں۔

لیکن شکیرا کے وکلاء کا کہنا ہے کہ 2014 ء تک ان کی زیادہ تر آمدنی بین الاقوامی دوروں سے آتی تھی اور وہ اسپین سے باہر کافی وقت گزارتی تھیں۔ شکیرا نے 2015 ء میں اسپین کو ٹیکس مقاصد کے لیے اپنی اصل رہائش گاہ قرار دیا۔انہوں نے کہا کہ اس نے 17.2 ملین یورو ٹیکس ادا کیے ہیں اور وہ قرض میں نہیں ہیں۔

غور طلب ہے کہ 2019 ء میں ایک الگ کیس میں جیرارڈ پیک پر 2008 ء اور 2010ء کے درمیان ٹیکس چوری پر 2.1 ملین یورو کا جرمانہ عائد کیا گیا تھا۔ شکیرا اور جیرارڈ پیک نے رواں سال جون میں اعلان کیا تھا کہ وہ 11 سال ایک ساتھ رہنے کے بعد الگ ہو گئے ہیں۔ ان کے دو بیٹے ہیں جن کی عمریں نو اور سات سال ہیں۔