لاہور:(سنو نیوز) پنجاب میں گذشتہ 24 گھنٹوں کے دوران ڈینگی مریضوں کی تعداد میں کافی اضافہ ہوا ہے، صوبے میں 141 نئے مریضوں میں ڈینگی کی تصدیق ہوئی ہے۔ علی جان خان سیکرٹری ہیلتھ کے مطابق رواں سال پنجاب کے 36 اضلاع میں ڈینگی کے 12 ہزار سات سو 96 کنفرم مریض رپورٹ ہوئے، رواں سال لاہور میں ڈینگی کے 5692 کنفرم مریض رپورٹ ہوئے ہیں۔ لاہور میں گذشتہ روز 76 نئے مریض سامنے آئے، رواں سال روالپنڈی میں ڈینگی کے کل 2571 مریض رپورٹ ہوئے، راولپنڈی میں گذشتہ روز 15 نئے مریضوں میں ڈینگی کی تصدیق ہوئی ہے۔ رواں سال گوجرانوالہ میں ڈینگی کے کل 1281 مریض رپورٹ ہوئے، گوجرانوالہ میں گذشتہ روز 15 نئے ڈینگی مریضوں کی تصدیق ہوئی، رواں سال ملتان میں ڈینگی کے کل 1269 مریض رپورٹ ہوئے۔ ملتان میں گذشتہ روز 18 نئے ڈینگی مریضوں کی تصدیق ہوئی، رواں سال فیصل آباد میں ڈینگی کے کل 693 مریض رپورٹ ہوئے، فیصل آباد میں گذشتہ روز 11 نئے ڈینگی مریضوں کی تصدیق ہوئی۔ گذشتہ 24 گھنٹے کے دوران شیخوپورہ، ساہیوال، اوکاڑہ، چکوال، بہاولپور اور وہاڑی میں ڈینگی کا ایک ایک نیا مریض سامنے آیا، پنجاب بھر کے ہسپتالوں میں اس وقت ڈینگی کے کل 147 مریض زیر علاج ہیں۔ ضلع لاہور کے ہسپتالوں میں اس وقت ڈینگی کے کل 77 مریض زیر علاج ہیں، ڈینگی سے بچنے کے لئے شہری اپنے ماحول کو صاف اور خشک رکھیں۔ یہ بھی پڑھیں: چکن گونیا کیلئے پہلی ویکسین کی منظوری دوسری جانب بلوچستان میں کانگو وائرس کےبڑھتے ہوئے کیسز کے پیش نظر پنجاب میں محکمہ لائیو سٹاک میں ہائی الرٹ جاری کردیا گیا ہے۔ صوبائی وزیر ابراہیم مراد نے صوبہ بھر میں قائم تمام لائیو سٹاک سینٹرز میں اینٹی کانگو سپرے لازمی کروانے کی ہدایات جاری کر دیں ہیں، صوبائی وزیر کی ہدایت پر سیکرٹری لائیو سٹاک کی آن لائن میٹنگ تمام اضلاع سے ذمہ داران نے میٹنگ میں شرکت کی۔ میٹنگ میں ایس او پیز پر عملدرآمد کرانے پر زور دیا گیا، پنجاب میں ابھی تک کوئی ایسا کیس رپورٹ نہیں ہوا، سو سے زائد نسلوں میں سے کسی ایک نسل میں یہ وائرس پایا جاتا ہے ۔ صوبائی وزیر لائیو سٹاک ابراہیم حسن مراد نے کہا کہ وائرس متاثرہ شخص سے دوسرے شخص میں بھی پھیل سکتا ہے، کانگو ایک ٹِک بورن وائرل بیماری ہے، متعدد جنگلی اور گھریلو جانور اس سے متاثر ہوسکتے ہیں ، احتیاط لازمی ہے تاہم گھبرانے کی کوئی بات نہیں ہے ، محکمہ لائیو سٹاک ایس او پیز پر عملدرآمد یقینی بنا کر جانوروں کو محفوظ رکھ رہا ہے ۔ دوسری جانب وزیر صحت ڈاکٹر ندیم جان کی ہدایت پر جعلی آن رجسٹرڈ ادویات ناجائز منافع خوری کیخلاف کریک ڈاؤن جاری ہے، ملک بھر کے تمام بڑے شہروں میں ڈسٹری بیوٹرز فارمیسی اور میڈیکل سٹورز پر چھاپے مارے جارہے ہیں۔