لاہور:(سنو نیوز) میڈیا کی رپورٹس کے مطابق فائنل میچ کے لیے نریندر مودی کرکٹ سٹیڈیم میں بنائی گئی پِچ کیسی ہوگی؟ تفصیلات سامنے آ گئیں ہیں، آسٹریلیا اور انڈیا کے مابین ہونے والے فائنل میچ کی پچ سلو ہوگی۔ یہ پچ پاک بھارت میچ جیسی ہوگی جو کہ چودہ اکتوبر کو کھیلا گیا تھا، یہ پچ بلے بازوں اور بولرز دونوں کے لیے سازگار ہے۔ پچ کیوریٹر نے بھارتی میڈیا کو بتایا کہ پہلے بیٹنگ کرنے والی ٹیم کے لیے تین سو پندرہ رنز تک بہترین سکور ہوسکتا ہے، بھارتی میڈیا کے مطابق آئی سی سی پچ کنسلٹنٹ نے فائنل کے لیے منتخب پچ کی تیاری کا جائزہ لیا۔ خیال رہے کہ آئی سی سی کرکٹ ورلڈ کپ 2023 کا فائنل کل کھیلا جائے گا، فائنل میں ناقابل شکست بھارت کو پانچ بار کے عالمی چیمپئن آسٹریلیا کا چیلنج درپیش ہے۔ دونوں ٹیمیں کل احمد آباد کے نریندر مودی سٹیڈیم میں مدمقابل ہوں گی، عالمی کپ میں اب تک آسٹریلیا اور بھارت 13 بار آمنے سامنے آئے، آٹھ میں آسٹریلیا، پانچ میں انڈیا کامیاب رہا۔ میچ سے پہلے ایئرشو اور بعد میں ڈرون کے کرتب دکھائے جائیں گے، احمد آباد میں ڈرون اور جیٹ طیاروں کی ریہرسل کی گئی۔ یہ بھی پڑھیں: کپتان بنتے ہی شان مسعود کے مداحوں کیلئے برُی خبر بھارت اور آسٹریلیا کی کرکٹ ٹیموں کے درمیان ورلڈ کپ 2003ء اور 2023ء میں حیران کن مماثلت سامنے آنے لگیں۔ ورلڈ کپ 2003ء میں آسٹریلیا نے فائنل سے قبل لگاتار 10 میچوں میں فتح حاصل کی تھی جبکہ ورلڈ کپ 2023ء میں بھارت نے بھی اسی کارکردگی کو دہراتے ہوئے فائنل سے قبل مسلسل 10 فتوحات حاصل کی ہیں۔ اسی طرح جنوبی افریقہ میں کھیلے گئے ورلڈ کپ 2003ء میں بھارتی ٹیم کو آسٹریلیا کے ہاتھوں گروپ میچ میں شکست کا سامنا کرنا پڑا جبکہ رواں ورلڈ کپ میں کینگروز کو بھارت کے ہاتھوں چنائی میں کھیلے گئے گروپ میچ میں بھاری شکست ہوئی۔