لاہور:(سنو نیوز) وزیراعلیٰ پنجاب محسن نقوی نے گورنمنٹ ٹیچنگ ہسپتال شاہدرہ کے مختلف وارڈز کا دورہ کیا، مریضوں کی عیادت کی اورطبی سہولتوں کا جائزہ لیا، ہسپتال کی فارمیسی میں رائزک انجکشن کے سٹاک کی موجود گی کے باوجود عدم  فراہمی اور انجکشن باہر سے خریدنے کے حوالے سے مریضوں نے شکایات کے انبار لگا دیئے۔ وزیراعلیٰ محسن نقوی نے کہا ہے کہ فارمیسی میں گئے تو رائزک انجکشن کا سٹاک موجود تھا، محسن نقوی نے صورتحال دیکھ کر شدید برہمی کا اظہار کیا اور سینئر میڈیکل افسر کی سرزنش کردی اور انجکشن باہر سے خریدنے والے مریضوں کے پیسے فوری طورپر واپس کرنے کا حکم دیا۔ محسن نقوی کا کہنا تھا کہ فارمیسی میں سٹاک ہونے کے باوجود انجکشن باہر سے منگوانے کا کوئی جواز نہیں بنتا، غریب مریض پیسے خرچ کر باہر سے انجکشن منگوائے اورہسپتال کی فارمیسی میں انجکشن بھی موجود ہو تو کیا یہ مینجمنٹ ہے، آئندہ ایسی شکایت ملی تو سخت کارروائی ہوگی۔

نگران وزیراعلیٰ پنجاب @MohsinnaqviC42 کا گورنمنٹ ٹیچنگ ہسپتال شاہدرہ اورمیوہسپتال کے زیرتعمیر ایمرجنسی بلاک کا دورہ @cmopunjabpk @SHCMEHealth @AmirMirTV @jakramaimc @ibrahimhmurad @ccpolahore @ALIJANKHAN1 pic.twitter.com/A1Z3euFswq

— Government of Punjab (@GovtofPunjabPK) October 17, 2023

بعد ازاں وزیراعلی محسن نقوی نے میوہسپتال کا دورہ کیا اور زیر تعمیر ایمرجنسی بلاک کی اپ گریڈیشن کے تعمیراتی کاموں کا جائز ہ لیا، انہوں نے ایمرجنسی بلاک کے گراؤنڈ، فرسٹ،سیکنڈ، تھرڈ اور فورتھ فلور کا معائنہ کیا اور ہر فلور پر تعمیراتی کام کی رفتار کا مشاہدہ کیا۔ وزیر اعلی پنجاب نے نئے تیار کردہ نرسنگ کاونٹر، وارڈ، ڈاکٹر روم اور واش رومز کا معائنہ کیا، وارڈ میں نئے سیلنگ فین لگانے کے کام پر محکمہ تعمیرات و مواصلات کے حکام کو شاباش دی اور تعمیراتی کاموں کے اعلی معیار کو سراہا۔ انہوں نے ایمرجنسی بلاک کی اپ گریڈیشن کے کام کو جلد مکمل کرنے اور چھتوں میں موجود سیم کے مستقل خاتمے کی ہدایت کی۔ اس موقع پر گفتگو کرتے ہوئے وزیراعلیٰ محسن نقوی کا کہنا تھا کہ 200 بستروں کا سٹیٹ آف دی آرٹ ایمرجنسی بلاک بنایاجا رہاہے۔ سیکرٹری تعمیرات ومواصلات نے ایمرجنسی بلاک کی اپ گریڈیشن کے تعمیراتی کاموں کے بارے میں وزیراعلٰی کو بریف کیا، صوبائی وزراء ڈاکٹر جاوید اکرم، عامر میر، ابراہیم حسن مراد، سیکرٹری صحت، کمشنر لاہور اور دیگر حکام بھی اس موقع پر موجود تھے۔