اسلام آباد:(سنونیوز) 9 مرلہ زمین پربغیر معاوضہ ادائیگی کے سڑک بنانے پر سپریم کورٹ نے حکومت پنجاب کو دس لاکھ روپے جرمانہ کردیا۔سپریم کورٹ نے پنجاب حکومت کو 10 لاکھ جرمانے کی رقم بھی زمین مالک کو ادا کرنے کی ہدایت کردی۔

تفصیلات کے مطابق سپریم کورٹ میں 9 مرلے زمین کے معاوضے پر سڑک بنانے اور معاوضہ نہ دینےکے کیس کی چیف جسٹس قاضی فائز عیسی کی سربراہی میں تین رکنی بنچ نے سماعت کی ،سماعت کے دوران چیف جسٹس قاضی فائز عیسی نے ایڈیشنل ایڈوکیٹ جنرل پنجاب پر اظہار برہمی کرتے ہوئے کہا کہ سرکار نے کسی کی زمین پر بغیر اجازت اور معاوضہ ادائیگی سڑک کیسے بنا دی؟ درخواست گزار نے سرکارکو زمین تحفے میں دی نہ ہی سرکار نے قانون کے مطابق زمین ایکوائر کی،یسے فضول مقدمے کی درخواست آپ نے سپریم کورٹ میں کیوں دائر کی؟

چیف جسٹس نے ایڈیشنل ایڈوکیٹ جنرل پنجاب سے مکالمہ کیا کہ ہمارا کام یہ رہ گیا کہ ہم ایڈوکیٹ جنرلز کو آئین پڑھاتے رہیں؟کیوں نہ ایسی فضول مقدمہ بازی کیلئے آپ پر جرمانہ لگائیں، ایڈیشنل ایڈوکیٹ جنرل کی ڈیوٹی کیا ہے؟ کیسے اسطرح فضول درخواست دائرکی؟۔

چیف جسٹس قاضی فائز عیسی نے کہا کہ حقیقی مقدمات سائڈ لائن کر کے فضول اور غلط مقدمات کیے جاتے ہیں، فضول مقدمات کرکے عوامی وسائل کے ساتھ ساتھ عدالتی وقت ضائع کیا جارہا ہے۔ عدالت نے حکومت پنجاب کو تیس دن کے اندر زمین مالک کو موجودہ ریٹ کے مطابق رقم ادائیگی کا حکم دے دیا۔

عدالت نے پنجاب حکومت کی اپیل مسترد کرتے ہوئے زمین مالک کو معاوضہ کی رقم ادا کرنے کا حکم دے دیا۔انٹرائل کورٹ اور ہائیکورٹ نے زمین مالک کے حق میں فیصلہ دیا تھاپنجاب حکومت نے گوجرانوالہ میں لیاقت علی نامی شہری کی زمین پر 2007 میں سڑک بنائی تھی۔